Os números do impacto do coronavirus na comunidade educativa da provincia de Lugo debuxan unha situación de estabilidade, porque os casos activos mantéñense en 29 repartidos en 18 centros e, por cuarta xornada consecutiva, non hai ningunha aula pechada. Con todo, tras esas cifras inalteradas hai algún cambio, porque na lista de instalacións afectadas polo covid hai novidades.
Os datos divulgados este venres pola Xunta revelan que se incorporaron á listaxe dous colexios, ambos por un positivo: o CEIP Xoán Requeixo de Chantada e o CEIP A Ponte de Lugo. Ao mesmo tempo, saen outras dúas instalacións: a escola infantil de Meira e o CEIP Manuel Mallo Mallo de Lugo.
Polo demais, na única área sanitaria de Galicia sen aulas pechadas, o centro afectado por máis positivos segue sendo o CPR Plurilingüe San José de Lugo, con seis.
GALICIA. Tampouco varía con respecto á xornada anterior o número de casos activos de covid-19 que afectan a centros educativos non universitarios e escolas infantís da comunidade, que se manteñen en 631, mentres que as aulas pechadas elévanse a 39 —cinco máis— e un centro continúa clausurado, a escola infantil unitaria de Cerdedo.
As infeccións activas soben nas áreas de Vigo (+2) e A Coruña (+6), ao tempo que baixan nas de Ferrol (-2) e Pontevedra (-6), mentres que se manteñen nas de Santiago, Lugo e Ourense.
Os casos activos en centros educativos de Galicia mantéñense en 631 e as aulas pechadas aumentan a 39
Deste xeito, a área de Vigo segue sendo a que concentra máis contaxios, 199, e ten 16 aulas pechadas —unha máis—. Mentres, a da Coruña sitúase con 178 casos activos e mantén nove aulas inoperativas.
Ségueas Pontevedra con 103 infeccións activas e catro aulas pechadas, ademais do único centro inoperativo actualmente en Galicia. O CEIP de San Roque de Vilanova de Arousa destaca con 16 contaxios como o centro da comunidade con máis casos, xunto a outro de Oleiros.
En canto á área de Santiago mantense con 78 positivos, mentres que as aulas pechadas aumentan a oito —tres máis—. A distancia, a de Ourense continúa con 35 casos activos e cunha aula clausurada pola incidencia do covid-19.
Con menos casos en centros educativos seguen as áreas de Lugo e Ferrol. A primeira mantense con 29 casos activos e por cuarta xornada consecutiva segue sen clases pechadas. E a segunda ten 9 casos activos e unha aula clausurada.
