A empresa Gestión Reina Galicia, vinculada á cadea El Buda del Moroso e con sede en Santiago, despediu a un dos empregados que enviou o vídeo no que dúas persoas se fan pasar por falsos rusos para amenzar a un lucense. "Este traballador recoñeceu que enviara o vídeo, pero cando nos entregou o teléfono estaba reseteado", explicaron desde a firma en declaracións á TVG.
O conflito entre a empresa e o cliente lucense que a contratou para o cobro dunha débeda encamíñase cara a vía xudicial. O avogado do afectado denuncia a "agresividade" dos cobradores vai en aumento. "De noite -na madrugada do martes ao mércores-, causáronlle danos na porta dun despacho que ten na Coruña, arrincáronlle a placa e deixaron un cartón de visita a nome do Buda del Moroso. A Funeraria do Cobro".
Esta actuación deu lugar a unha cuarta denuncia presentada na comisaría da zona sur da Coruña, que se suma ás tres interpostas ante a Garda Civil en menos dunha semana por este caso. O denunciante explicou que lle fixeron uns rayazos cun obxecto punzante para "debuxar unha diana duns trinta centímetros". Os danos ocasionados están valorados en 450 euros.
O xerente de Xestión Reina Galicia, vinculada ao Buda do Moroso, considera que este proceso se debe a "unha trampa urdida por un cliente para non pagar os seus honorarios. Son denuncias falsas e o noso gabinete xurídico tomará medidas".
Este argumento non é aceptado polo avogado do ameazado, quen considera que "os insultos e as actitudes violentas sucédense e non se trata dun empregado que actúa de forma irregular, que xa tería que estar sancionado, senón dunha forma de actuar. Non só levaron a unha situación límite co cliente, que precisou atención psicolóxica e teletrabaja sen poder ir ao seu propio despacho. A súa nai tivo que ser hospitalizada por mor das ameazas e tamén mantiveron unha actitude insultante e intimidatoria con avogadas e persoal do meu despacho e con familiares meus".
TELÉFONOS ENCRIPTADOS. Segundo este letrado, o persoal do Buda da Moroso chama en ocasións con teléfonos encriptados "para que non podamos gravarlles, como fixeron para dicirlle cousas gravísimas a unha muller do bufete, da que sabían incluso a dirección do seu domicilio", afirman desde o despacho legal que asesora ao denunciante.
Unha das cuestións que chama a atención é a base de datos que manexaría O Buda do Moroso para acceder a teléfonos e direccións do bufete que asesora ao denunciante e doutras persoas que se viron implicadas no conflito.
As diferenzas entre O Buda do Moroso e o cliente iniciáronse cando este decidiu rescindir o contrato "polo que nos ordenaba cobrarlle 8.500 euros", recoñecen desde Xestión Reina Galicia. O contrato estipulaba que a xestora do cobro levaría un 37% da contía e 400 euros de honorarios no momento do acordo, "que son as contías que pretendemos recuperar", agregan. O seu xerente recalca que o contrato está asinado o 17 de xaneiro de 2021, "por erro, pero se rubricou en 2022, como se demostra no WhatsApp no que o cliente nos envía os seus datos".
Cando os comerciais de Xestión Reina Galicia visitan ao moroso, que tamén lles denunciou pola súa actitude violenta ante a Garda Civil, este díxolles que quería falar co acredor "e entre eles chegaron a un acordo, pero nós queremos cobrar os nosos honorarios". Tamén sinalan que conta con vídeos e gravacións das súas intervencións.
Aínda que houbo un contacto inicial no que se lle ofreceu 500 euros ao Buda do Moroso para resolver o problema, "os seus representantes responderon con insultos e enviámoslles un burofax para anular o contrato", indica o avogado do cliente, quen afirma que este caso adquire unha dimensión preocupante "e as autoridades deben tomar medidas para frear esta espiral".
