Tras ser reelixido como presidente da Asociación de Criadores de Raza Rubia Galega (Acruga) para os próximos catro anos, César Dorado explicou que iniciará o seu novo mandato cunha serie de desprazamentos ás explotacións, "sobre todo as máis alonxadas", para explicar a todos os gandeiros as vantaxes de pertencer a esta entidade.
Dorado, que está á fronte desta asociación desde o ano 2005, obtivo nas pasadas eleccións un total de 540 votos, fronte aos 301 de Antonio Núñez Torrón e os 150 de José Antonio Fernández Álvarez, os outros dous candidatos.
O reelixido presidente de Acruga, que destacou a alta participación, xa que votou o 85% dos 1.255 gandeiros con este dereito, agradeceu o apoio recibido nestes comicios, o que, segundo el, é "un recoñecemento a labor que vimos facendo durante todos lestes últimos anos". Dorado prometeu que a cambio "desa confianza" ofrecerá "moito máis traballo e dedicación, para seguir sacando adiante todos vos proxectos que temos en marcha" e conseguir "mellorar" o actual prezo que ten a carne.
César Dorado tamén se mostrou partidario de facer de Acruga unha entidade "totalmente aberta" a todos os gandeiros. "Todos deben saber, tanto os que votaron como os que non, que este equipo estará sempre disposto a escoitar e atender a calquer asociado que así o demande", explicou.
OBXECTIVOS. Entre os obxectivos marcados pola directiva de Acruga para os próximos catro anos, Dorado mostrou a súa confianza en seguir avanzando no campo da xenómica dos sementais e tamén se mostrou aberto a coñecer a opinión dos gandeiros de face á dispoñibilidade de dose de seme sexado, co que se permitirá elixir o sexo da cativa antes de que se produza a fecundación. "Para conseguilo teríamos que enviar un touro a Inglaterra, que é o único lugar onde dispoñen desta tecnoloxía e tamén serían dose máis caras, polo que haberá que ver a viabilidade económica desta opción", sinalou.
En canto ao resultado das eleccións e a influencia que tivo o voto delegado no resultado das mesmas, Dorado aclarou que é un sistema "non que os demais candidatos tiñan as mesmas posibilidades que eu". Tamén fixo alusións á campaña, "que foi dura", pero na que os outros dous candidatos "só se dedicaron a criticar e cuestionar a raza, no canto de propoñer proxectos", indicou.