Dentro do plan de renovación dun total de 18 vehículos do parque móbil da Deputación Provincial, o goberno que preside Darío Campos aprobou a adquisición de cinco coches eléctricos, aos que se destinarán 128.925 euros dos 287.000 dos que consta o contrato.
Estes cinco novos modelos eléctricos, que deben cumprir como requisitos indispensables dispor dunha batería de 60 kWh e unha autonomía estimada de 350 quilómetros -segundo o novo ciclo de homologación NEDC-, substituirán a outros tantos Seat Eivissa con motor diésel, matriculados en novembro do ano 2010 e cunha media de aproximadamente 250.000 quilómetros nos seus motores.
Cun uso de case 30.000 quilómetros anuais por vehículo, a entidade provincial gasta só en combustible destes cinco modelos que se van substituír unha media de 6,5 euros cada 100 quilómetros, o que se traduce en 1.950 euros anuais. No caso dos vehículos eléctricos, o custo da enerxía para poder mover o coche 100 quilómetros redúcese a unha media de 1,2 euros, o que reduce a factura anual por este concepto a 360 euros.
Esa diferenza no custo da enerxía suporá que ao ano a Deputación aforrará 7.950 euros, é dicir, 47.700 euros menos, ao cabo de seis anos. Desde un ano antes poderase considerar que o sobrecusto que suporá a incorporación destes vehículos eléctricos ao parque móbil provincial quedará xa amortizado.
O concurso para facerse con estes cinco vehículos eléctricos inclúe tamén a instalación doutros tantos postes de recarga.
Segundo explicou o presidente da Deputación Provincial, Darío Campos, un destes postes instalarase na sede do TIC, outro no Pazo de San Marcos e os tres restantes na nave do parque móbil, en Garabolos.
Unha vez que se resolva o concurso, ao que se presentaron unicamente dous modelos -Renault Zoe e Nissan Leaf-, a empresa adxudicataria terá un prazo de 120 días para entregar os vehículos, polo que a previsión é que incluso poidan estar operativos antes de que finalice o presente exercicio.
