A Deputación Provincial de Lugo premiou a cinco emprendedores que están a piques de abrir os seus respectivos negocios en zonas rurais da provincia con 10.000 euros para cada un, unha cantidade que lles axudará a dar os seus primeiros pasos", explicou a deputada de Promoción Económica e Social, Sonsoles López Izquierdo, na entrega simbólica dos cheques aos gañadores.
Os proxectos premiados son iTechTerm, Almazara de Aceite, Radis, Centro Residencial San Vicente e a Cantina Albergue Camiño de Santiago, empresas que, en conxunto, crearán uns 30 postos de traballo en zonas rurais da provincia de Lugo.
Itech Term é un proxecto desenvolvido por tres universitarios que crearon un sistema, mediante a instalación dun sensor subcutáneo en vacas de leite, para detectar en tempo real calquera problema de saúde nas produtoras, mentres que Almazara de Aceite é unha explotación agrícola na que se plantará dez hectáreas de oliveiras para producir aceite ecolóxico.
Radis ofrecerá servizos de detección de gas radón e medidas para a súa eliminación cando alcance concentracións prexudiciais para a saúde, mentres que o centro Residencial San Vicente é unha residencia para persoas maiores que aproveitou un edificio sen uso en Rábade.
Para rematar, a Cantina Albergue Camiño de Santiago, que puxo en marcha unha emprendedora, está situada nas Seixas, en Palas de Rei, en pleno Camiño Primitivo de Santiago.
López Izquierdo destacou que "a posta en marcha destes negocios é unha oportunidade para a dinamización social e económica do medio rural, pois estímase que estes proxectos xerarán a medio e longo prazo uns trinta novos postos de traballo".
