A Deputación de Lugo pediralle formalmente á Xunta de Galicia que os concellos se ocupen da xestión de polo menos un 15% dos fondos que reciba para paliar os efectos da pandemia e das restricións aplicadas para frear o avance do covid-19.
O pleno da institución decidiuno na sesión ordinaria que se celebrou este martes, a proposta do grupo provincial do Partido Socialista, que forma xunto co BNG o goberno bipartito da institución.
A portavoz socialista do goberno, Pilar García Porto, defendeu que "a loita contra o covid supuxo para os concellos atender a novas necesidades dos veciños nun contexto de incerteza e dificultade, no que, ao devir sanitario, foise sumando o impacto socioeconómico da pandemia".
"A Xunta de Galicia non deixou de esixirlles aos concellos que asuman competencias impropias, tan custosas como a desinfección dos centros educativos", dixo García Porto, ou incluso "que controlasen medidas excepcionais como o toque de queda ou as limitacións á mobilidade".
Con todo, dixo a deputada, a pesar de que a "Xunta recibiu aproximadamente 1.100 millóns de euros do Goberno e da Unión Europea", non "tivo en conta aos concellos á hora de empregalos".
