O presidente da Deputación de Lugo, José Tomé, anunciou un plan "pioneiro" en Galicia para a formación de 321 traballadores, máis da metade dos funcionarios da institución provincial.
Este plan porase en marcha xa a semana que vén e estenderase ata maio. "Ten un dobre obxectivo: por unha banda, dar ferramentas aos empregados públicos da Deputación para progresar na carreira profesional a través da mellora das súas capacidades, e supón tamén unha mellora nas súas condicións laborais e salariais", explicou Tomé.
Son tres os niveis de formación entre os distintos grupos de funcionarios, con catro módulos acerca de Deputación, recursos humanos, procedementos administrativos e novas tecnoloxías. Impartiranse oito edicións dos distintos cursos, que en total sumarán 320 horas de formación (40 horas por cada edición).
A participación nestas actividades será "voluntaria", aínda que avisa o presidente provincial que "será necesaria para a promoción profesional" na Deputación. "Ao mesmo tempo melloramos o funcionamento na Deputación e a atención nos concellos, a atención aos cidadáns e a prestación de servizos públicos", valora.
Remarca que estes servizos públicos "son o único escudo eficaz e universal" ante situacións de crises como a que se padece actualmente.