O goberno da Deputación de Lugo anunciou que a institución, grazas á colaboración da Asociación de Empresarios de Primeira Transformación da Madeira, limpará nos próximos días 1.000 quilómetros de estradas provinciais en catorce municipios lucenses, onde o temporal de neve provocou a caída de ramas e de árbores sobre esas vías. Anunciárono este luns pola mañá o vicepresidente do ente provincial e responsable de Vías e Obras, Argelio Fernández Queipo, e o presidente da Asociación de Empresarios de Primeira Transformación da Madeira, Daniel Díaz Ramos.
O investimento previsto pola Deputación de Lugo para deixar expedita a rede viaria provincial ascende a 400.000 euros e os traballos terían que estar terminados nun prazo de sete días. Nestes momentos xa están a traballar nas estradas 24 equipos formados por un total de 105 operarios.
Fernández Queipo quixo destacar a prema coa que se puxo a traballar desde o primeiro momento o goberno da Deputación de Lugo e a "inmediata resposta e disposición por parte da Asociación de empresarios de Primeira Transformación da Madeira", ademais de agradecer que o seu presidente "respondese de forma áxil e diligente" nun momento de urxencia.
Díaz Ramos, pola súa banda, confirmou que a asociación chamou "a todas as empresas do sector" e aquelas das que recibiu resposta "incorporáronse de forma inmediata ás ordes da Deputación".
