A Deputación Provincial de Lugo destinará 300.000 euros ao programa Dotación e Mellora de Servizos
As axudas oscilarán entre os 1.000 e os 6.000 euros e poderán solicitarse ata o 28 de agosto. Poden acceder a elas asociacións e agrupacións veciñais, comunidades de usuarios de augas, comunidades de montes, asociacións de gandeiros, agricultores ou produtores forestais, e poderán destinarse a inmobles ou equipamentos que sirvan para mellorar servizos, calidade de vida e dinamizar o asociacionismo veciñal.
Así, considéranse actuacións subvencionables, entre outras, as melloras no firme e sinalización de vías públicas comunais, as obras de mellora nos locais das entidades veciñais, a adquisición de equipamento necesario para o funcionamento das asociacións, obras en captacións, canalizacións e depósitos de auga, así como a recuperación de espazos públicos comúns, fontes e a súa contorna.
As bases desta convocatoria de axudas están publicadas no Boletín Oficial da Provincia (BOP) do 27 de xullo. A portavoz socialista do goberno provincial, Pilar García Porto, explicou que o obxectivo desta liña de axudas é "dotar de máis e mellores servizos o noso rural para fixar poboación", á vez que se reforza a "cooperación co tecido social da provincia".
