A Deputación de Lugo acaba de iniciar os traballos do plan de aforro enerxético Ilumin@, que suporá a substitución de 3.200 luminarias por outras de tecnoloxía led en 38 concellos da provincia. Esta actuación suporá un aforro global de 62.000 euros ao ano para estes municipios.
Así o estimou este martes o presidente provincial, José Tomé Roca, tras asinar coas empresas adxudicatarias deste proxecto os correspondentes contratos de subministración e instalación de material, un trámite que, segundo recalcou, permite que se inicien hoxe mesmo esas tarefas. O goberno provincial adxudicou ese contrato en preto de 530.000 euros, dividido en tres lotes.
BENEFICIARIOS. A Deputación adxudicou á empresa Manuel Novoa Castro S.L.U., en 174.000 euros, eses traballos nos concellos de Meira, Burela, A Pastoriza, Riotorto, Lourenzá, Ourol, Mondoñedo, Xermade, O Vicedo, Ribeira de Piquín, Alfoz, Trabada, O Valadouro e Vilalba.
O segundo contrato, que supón unha inxección de 186.000 euros, asúmeo a empresa Hallman Energie S.L. e afectará os municipios de Baralla, Begonte, Castro de Rei, Castroverde, Cervantes, Cospeito Friol, Guntín, Láncara, Navia de Suarna, Negueira de Muñiz e Rábade.
Para rematar, a terceira adxudicataria, Cyme Santos Héctor S.L., executará por case 167.000 euros esas mesmas actuacións nos concellos da Pobra do Brollón, As Nogais, Carballedo, Folgoso do Courel, Monforte, O Incio, O Páramo, O Saviñao, Pantón, Quiroga, Samos e Sober.
No acto de firma dos contratos, José Tomé recordou que o programa Ilumin@ está dotado con 723.000 euros, dos que o 80% son fondos europeos que a Deputación de Lugo conseguiu a través de Idae (Instituto para a Diversificación e Aforro da Enerxía), un organismo que depende do Ministerio de Transición Ecolóxica.
VANTAXES. Os 38 concellos adheridos a este proxecto aforrarán de forma global uns 62.000 euros, ata un 63% da facturación eléctrica das instalacións municipais nas que se actuará -fundamentalmente, iluminacións públicas exteriores-, segundo as estimacións do goberno provincial.
Ademais, o executivo que lidera Tomé destacou que a tecnoloxía led permitirá reducir o consumo nun total de 450.000 quilowatts ao ano, algo que minimizará a pegada de carbono. Para rematar, fixo fincapé en que o plan Ilumin@ forma parte do "obxectivo estratéxico" da Deputación de cooperar cos municipios para que poidan prestar "servizos públicos eficientes á cidadanía aforrando custos, pero tamén preservando ou medio ambiente".