O presidente da Deputación de Lugo, José Tomé, e a Deputada de Réxime Interior, Pilar García Porto, presentaron este martes o programa Actívache, unha iniciativa vinculada ao turismo activo, científico e mindfulness que se celebrará os fins de semana de maio e xuño ao longo de 18 concellos da provincia de Lugo.
Este programa, explicaron, nace co obxectivo de dar a coñecer os recunchos de toda a provincia a través de propostas diferentes para realizar en familia, con amigos ou só.
Así, darase prioridade á participación dos veciños da provincia, que poderán realizar actividades como iniciación aos cogomelos de primavera ou ao barranquismo, que se celebrarán o 1 e 2 de maio, pero tamén actividades de sendeirismo, de montaña, surf ou Tai Chi e ioga. Tamén está previsto que se realice unha actividade nocturna para a observación dos ceos no concello de Muras. Todas as actividades serán gratuítas.
Durante o acto, Tomé Roca sinalou que Actívache nace pola aposta dun turismo de calidade, non masificado, sostible, de experiencias, na natureza e que pon en valor o patrimonio. "Desde a Deputación entendemos que promover o turismo de proximidade é un xeito de axudar á recuperación da economía e tamén un xeito de promover un lecer seguro en tempos de restricións de mobilidade", engadiu.
As persoas interesadas en participar nas dúas primeiras actividades xa poden inscribirse na páxina web da Deputación. Para máis información enviar un correo electrónico [email protected] poden chamar aos teléfonos 982.26.00.11
