A xunta de goberno da Deputación de Lugo aprobou este venres a adxudicación, por 1,2 millóns de euros, de diferentes actuacións de mellora en dez estradas da rede provincial.
A portavoz socialista do goberno provincial, Pilar García Porto, concretou que estes proxectos beneficiarán a estradas que atravesan os municipios de Portomarín, Negueira de Muñiz, Vilalba, Guitiriz, Trabada, O Saviñao, Lugo e Guntín.
No caso de Portomarín, a empresa Ovisa Pavimentos e Obras encargarase de acondicionar o tramo entre os puntos quilométricos un ao catro da LU-P-4902 (Alto do Valiño con Valdeporras por Vilaxuste), así como outro tramo da LU-P-4909, que conecta Toxibo coas Neves. O prazo de execución será de tres meses e o orzamento para esta actuación, de 258.000 euros.
En Negueira de Muñiz, a Deputación acometerá obras de mellora do firme da LU-P-3601, a estrada que une A Fonsagrada e Negueira polo Acivro, entre os puntos quilométricos 1,800 e 3,100. A empresa adxudicataria é Ovisa Pavimentos e Obras e o orzamento ascende a 95.000 euros.
A Deputación adxudicou tamén en Vilalba traballos de mellora na LU-P-6501, a estrada que une o concello vilalbés con Feira do Monte, onde acondicionará preto de catro quilómetros, desde o inicio da vía ata o punto quilométrico 3,835, por un importe de 241.000 euros; e na LU-P-6502, de Vilalba a Chavín pola Balsa, onde a Deputación destinará 191.000 euros para traballos entre o quilómetro 2,1 e o 4,6. A empresa adxudicataria de ambas as actuacións é Francisco Gómez e Cía SL, que terá un mes e medio de prazo de execución.
A xunta de goberno acordou tamén adxudicar os traballos de rehabilitación do firme e da senda peonil da LU-P-2304, que une Guitiriz con Sete Muíños, por 110.231 euros a Ovisa Pavimentos e Obras. O proxecto inclúe actuacións nos primeiros 870 metros de vía, e o prazo de execución é de dous meses.
En Trabada, a empresa Francisco Gómez e Cía rehabilitará o firme da LU-P-6101, que conecta o municipio coa Ría por Sante, nun tramo de catro quilómetros entre os puntos quilométricos 3,554 e 7,556. O investimento é de case 176.000 euros e o prazo de execución, de dous meses.
A xunta de goberno acordou tamén adxudicar os traballos de rehabilitación do firme e da senda peonil da LU-P-2304, que une Guitiriz con Sete Muíños
En O Saviñao, quedou adxudicada a rehabilitación dun tramo de preto de cinco quilómetros da LU-P-4202, que comunica Pacios con Currelos por Aldosende. Fevisa Vías e Obras SL fará as melloras, que afectarán o tramo entre o punto quilométrico 17,2 e o 21,9, por un importe de 97.000 euros e dous meses de prazo de execución.
Tamén saíu adiante a adxudicación das obras para melloras en dúas estradas que unen os concellos de Lugo e Guntín á empresa Construcións Carballeira por un importe de preto de 90.000 euros. O proxecto, cun prazo de execución de dous meses, inclúe a rehabilitación do firme da estrada LU-P-2406, de Lousada a Longalai pola Mota, nun tramo de cinco quilómetros, entre os puntos quilométricos 1,35 e 5,8; e da estrada LU-P-2402, de Lousada a Tendín, nos primeiros 300 metros de estrada.
