A Garda Civil no marco da operación Karch detivo a un veciño de Monterroso de 25 anos, a un de Chantada de 31 anos e a outro de Vilamartín de Valdeorras de 34 anos como presuntos autores dun delito continuado contra o patrimonio.
Segundo informou o Instituto Armado, na investigación policial efectuada, así como nos rexistros practicados nos domicilios dos detidos, foron intervidos efectos relacionados cos feitos delituosos e documentación que acredita o alleamento dalgún dos mesmos.
Os detidos serán postos a disposición do xulgado de primeira instancia e instrución número 1 de Chantada nas próximas horas, indicaron as mesmas fontes.
Os efectos intervidos atópanse depositados en dependencias oficiais da Garda Civil na localidade de Chantada, para que poidan ser recoñecidos polos seus lexítimos propietarios.
