Unha delegación da destilería irlandesa Irish Destillers, da multinacional francesa Penord Ricard, completou unha viaxe a Lugo para revisar o estado de diversos bosques de carballos na provincia, previamente seleccionados pola aptitude da súa madeira para elaborar toneles.
A viaxe de traballo inscríbese nun programa de colaboración que, desde hai anos, mantén a multinacional cun grupo de investigación da Universidade de Santiago de Compostela sobre os recursos forestais de Galicia para desenvolver o potencial da reserva madeireira para a tonelería.
Acompañados polo profesor Pablo Vila Lameiro e outros investigadores do grupo BioModem da Universidade de Santiago de Compostela, o equipo integrado polos expertos irladenses Kevin O'Gordman, Paddy Pusher e Curran Finnbarr analizaron o estado e a evolución dos traballos de investigación.
Ademais, aproveitaron a viaxe de traballo para planificar os pasos a dar nos próximos meses, entre os que se inclúe un proxecto para investigar o uso da madeira de castiñeiro na fabricación de toneles. O grupo Biomodem e a empresa irlandesa estudarán as aptitudes da madeira de castiñeiro mediante análise dos seus compoñentes volátiles.
Os bosques de carballo visitados pola delegación irlandesa conteñen árbores libres de ramas ata seis ou sete metros de altura e con diámetros superiores a 35 centímetros. Aínda que este tipo de árbores non son os que máis abundan en Galicia, explicou Vila Lameiro, a "boa calidade das masas de carballos galegas aseguran o abastecemento de materia prima".
