A Asociación de Emprendedores de Galicia (Ascega) denuncia que máis do 40% das leiras e pazos que acollen vodas e banquetes na provincia de Lugo operan de xeito ilegal ao ofrecer servizos sen a licenza e o seguro correspondentes
A asociación dirixiuse por escrito a varios concellos e organismos locais dependentes da administración autonómica para alertar dos riscos que corren os usuarios dese tipo de servizos "que funcionan á marxe da legalidade". Así mesmo, pon o foco sobre unha suposta competencia desleal "que afecta a traballadores e empresarios que si cumpren as normativas".
Ascega recorda nun comunicado que "a lei non permite a realización de eventos" deste tipo "con calquera outra licenza como poida ser de catering ou de instalación de carpa". "E se non hai permiso de actividade, non hai seguro, plans de evacuación ou prevención de riscos laborais", apunta a asociación.
Consciente desta situación, o colectivo solicita aos organismos correspondentes na provincia de Lugo que "verifiquen o status de legalidade de polo menos catro establecementos situados nela, contornas que se promocionan e publicitan como puntos de celebración de vodas e banquetes".
