A curva desta última onda de covid-19 na área sanitaria de Lugo empeza a descender. A provincia rexistra este martes un total de 1.834 casos activos de covid-19. Isto supón un novo descenso de infeccións activas –menos que a xornada anterior– e unha continuidade da tendencia marcada nos últimos días.
A análise dos casos activos por municipios revela que os grandes brotes empezan a desaparecer pero tamén que agora están os positivos máis repartidos, en concellos con menos poboación que os mariñáns ou a capital pero que reciben visitantes no verán.
"Houbo concellos que sumaban entre 40 e 50 casos diarios. Agora na Mariña percíbese unha baixada importante e en Lugo tamén están a empezar a facelo. Pero é verdade que aparecen casos en case todos os municipios, de Láncara a Brollón", apuntou este luns o xerente da área, Ramón Ares. No segundo caso, por exemplo, pasouse nunha semana de catro a 16 casos, moi probablemente pola mobilidade propia do verán. A pesar desa extensión dos positivos por gran parte do mapa da provincia, Ares recorda que o rastrexo, a detección e illamento de positivos en municipios de menor tamaño resulta máis sinxelo e que tenden a controlarse rápido.
A pesar da dispersión de persoas infectadas, o certo é que esta semana hai máis concellos lucenses libres de covid que a pasada: seis fronte aos dous da anterior. Trátase de Triacastela, Trabada, Ribas de Sil, Pol, Muras e Cervantes.
De todos os xeitos, será preciso esperar uns días para comprobar se ese ritmo efectivamente descende ou está relacionado coa contabilidade do fin de semana, período no que adoitan facerse menos probas PCR. Os datos diarios empezan a ofrecer unha visión máis realista a partir do mércores.
