O Ministerio de Transportes, Mobilidade e Axenda Urbana (Mitma) formalizou, por 8,4 millóns de euros, o contrato de obras para mellorar as condicións de seguridade e circulación nos túneles da A-6 de Neira, San Pedro, Doncos e O Cereixal, todos na provincia de Lugo.
O departamento estatal tamén informou da contratación, por 8,1 millóns de euros, de obras de mellora nos túneles de Villafranca, Trabadelo e La Escrita, na autovía A-6 na provincia de León, e dos de Pedrafita e Montefurado, na autovía A-6 e na estrada N-120, respectivamente, na provincia de Lugo.
O ministerio apunta que na actualidade estas infraestruturas teñen unhas condicións de explotación favorables, pero que é necesario abordar esta actuación para actualizar as súas instalacións. Estas actuacións, incluídas no Plan de Recuperación, Transformación e Resiliencia (PRTR) e financiadas cos fondos NextGenerationEU, están encamiñadas a adaptar esas construcións aos requisitos de seguridade e vialidade establecidos pola Unión Europea.
O PRTR ten un orzamento de 357 millóns para adaptar os túneles á normativa europea e para potenciar a protección da fauna e os usuarios vulnerables. En concreto, financiará actuacións na rede de estradas do Estado para mellorar as saídas de urxencia, a sinalización, o balizamento, a iluminación, a ventilación, a instalación eléctrica, a protección antincendios, a drenaxe, a comunicación ou a xestión do tráfico.
