O goberno da Deputación de Lugo celebrou este mércores a sesión constitutiva do primeiro Consello Provincial de Turismo, no que se integraron, ademais da propia institución -con representantes de todos os partidos políticos-, unha quincena de organizacións vinculadas, dun ou outro modo, a este sector.
O presidente da Deputación, Darío Campos, exercerá tamén a partir de agora como presidente do Consello Provincial de Turismo, mentres que o deputado provincial Eduardo Vidal actuará como vicepresidente.
Contará, ademais, con representación de cada un dos grupos políticos da corporación provincial, de modo que formarán tamén parte do mesmo as deputadas socialistas Pilar García Porto e Sonsoles López Izquierdo; Juan Carlos Armesto e Demetrio Salgueiro, do Partido Popular; e Antonio Veiga, por parte do BNG.
O consello tamén conta con representación da Mancomunidade de Municipios da Mariña, do Consorcio de Turismo da Ribeira Sacra, do Campus de Lugo, do Clúster de Turismo de Galicia, da Asociación de Amigos do Camiño de Santiago e da Asociación Provincial de Empresarios de Hostalería.
Tamén participan no mesmo a Federación Galega de Comercio, a Asociación Profesional de Guías de Turismo de Galicia, a Asociación Galega de Propiedade Balnearia, Auxilia, o Área de Turismo da Deputación, a Asociación Galega de Axencias de Viaxes e a Federación Galega de Turismo Rural.
Ademais, acordouse o nomeamento de Miguel Pazos Otón, director do Centro de Estudos de Investigación Turísticas (Cetur) da Universidade de Santiago de Compostela -que forma do Consello de Turismo de Galicia-, como "membro experto" do propio Consello.
A posta en marcha do Consello Provincial de Turismo é unha das medidas definidas no Plan Estratéxico de Turismo da Provincia de Lugo 2017-2020.
