Representantes dos municipios que integran a reserva da biosfera do río Eo, Oscos e Terras de Burón —os de Ribadeo, Trabada, A Pontenova, Ribeira de Piquín, Baleira, A Fonsagrada e Negueira de Muñiz en Lugo e Castropol, Vegadeo, Taramundi, San Tirso de Abres, Villanueva de Oscos, Santa Eulalia de Oscos e San Martín de Oscos en Asturias— mantiveron este mércores un encontro na Fonsagrada para decidir as próximas liñas de actuación a seguir para o impulso da comarca. Entre as medidas acordadas destaca un proxecto para promover a gandería extensiva de porco celta na comarca.
Segundo explicou o rexedor fonsagradino, Carlos López, o proxecto, que anteriormente fora denegado polo Ministerio de Fomento, volverano a presentar agora cunha serie de modificacións, co obxectivo de lograr o aproveitamento dunhas dez hectáreas de bosque autóctono para a cría e coidado de porco de raza celta.
Trátase dunha iniciativa de tipo experimental que contaría coa colaboración da USC e que contribuiría a crear riqueza e asentar poboación na zona, segundo destacou o rexedor fonsagradino.
Entre os acordos alcanzados nesta reunión, os representantes municipais coincidiron na necesidade de pedir aos gobernos autonómicos de Galicia e Asturias axudas técnicas e económicas para poder levar a cabo máis iniciativas deste tipo, como unha encamiñada á recuperación da arquitectura popular da zona ou a posta en marcha dun plan específico para a limpeza das marxes e canles dos ríos da conca do Eo.
Tamén se fixou para o próximo 21 de maio, o Día da Reserva do Río Eo, no que os diferentes concellos promocionarán a zona a través dos seus diversos produtos.
