As comunidades de montes de Farelo, en Antas de Ulla, e de Novelúa, en Monterroso, ofrecerán dereitos de absorción de dióxido de carbono (CO2) ás empresas que, de xeito voluntario, queiran adquirilos. Para iso, as dúas comunidades inscribiron os proxectos de restauración de 110,8 hectáreas de monte no rexistro de absorcións de dióxido de carbono que facilita o Ministerio de Transición Ecolóxica.
A iniciativa consistiu na plantación de máis de 100.000 árbores en superficies que estaban degradadas e sen aproveitamento produtivo. Estas zonas recuperáronse con piñeiro do país mellorado xeneticamente, piñeiro insigne e frondosas caducifolias. Para o ano 2022 está previsto que se completen os traballos de restauración de 43 hectáreas máis.
A inscrición neste rexistro permitirá que as comunidades poidan recibir fondos das empresas interesadas, pois está previsto que as superficies plantadas capten ao redor de 27.000 toneladas de dióxido de carbono durante 30 anos nos que, como mínimo, as comunidades manterán as masas arbóreas.
As comunidades de montes destinarán a integridade dos fondos captados ao mantemento dos traballos silvícolas previstos para cumprir o obxectivo de que esas masas forestais cheguen a adultas.
Na comunidade de Farelo plantáronse 85,5 hectáreas de piñeiro do país e 13,8 de bidueiros. En Novelúa plantáronse un total de 11,4 hectáreas, 8,8 de piñeiro e 2,6 de castiñeiro. Os proxectos promovidos polos dous montes mancomunados contaron co apoio e a coordinación da Asociación Forestal de Galicia, dentro dun plan a nivel autonómico.
