A empresa pública Tragsa encargarase ata finais deste ano do mantemento das zonas verdes que dependen da Deputación de Lugo, segundo acordou a xunta de goberno do organismo provincial. O montante económico por estes seis meses ascende a 413.000 euros.
En decembro pasado, a Deputación adquiría unha acción de Tragsa, polo que esta pasaba a ser medio propio instrumental desta institución. Ese mesmo mes o organismo provincial tamén aprobaba encargarlle a esta empresa pública o mantemento das zonas verdes, o que posibilitaba a subrogación dos traballadores que pertencían á extinta sociedade do chan Suplusa nas mesmas condicións laborais e salariais.
Ese encargo era por seis meses, prorrogables por outros tantos, tal e como se acordou este venres, tras os informes das áreas de medio ambiente, intervención e contratación, segundo deu conta a portavoz socialista do equipo de goberno, Pilar García Porto.
CRÍTICAS DO PP. O acordo adoptado pola Deputación de Lugo desatou as críticas do partido da oposición porque considera que o custo do mantemento das zonas verdes "dispárase" en relación a cando se encargaba de este traballo Suplusa.
O viceportavoz provincial do PP, José Antonio García, acusou o presidente José Tomé de escurantismo por non dar explicacións sobre os custos reais dos labores que está a desempeñar Tragsa.
García afirmou que o bipartito xustificou a liquidación de Suplusa para "adelgazar vos custes na Deputación e agora dispáranse vos gastos co contrato con Tragsa".