A asociación Castaño y Nogal esixe ás institucións máis implicación coa ruta Quintá-río Donsal. A reivindicación chega durante o desenvolvemento da novena edición do campo de traballo internacional neste itinerario, que discorre por Becerreá, parte de Navia e Cervantes. Toman parte nove mozos, ente eles dous de Italia.
O colectivo reclamou este martes durante unha rolda de prensa máis apoio institucional da Xunta e da Deputación, das cales, dixo o presidente, Antonio Álvarez González, "só se recibiron axudas mínimas". "A gran maioría do financiamento de Castaño y Nogal é de carácter privado", explicou.
Álvarez González pediu un incremento das axudas públicas "xa non só para a conservación da ruta do Donsal, senón para o conxunto do medio ambiente galego". Unha das reclamacións principais do colectivo céntrase en que tanto Xunta como Deputación poñan a disposición maquinaria "que teñen parada en zonas próximas" para colaborar nas tarefas de mantemento.
VOLUNTARIOS. Na rolda de prensa tamén participaron o director técnico do campo de traballo internacional da ruta Quintá-río Donsal, Pedro Guerreiro Igrexas, e tres voluntarios do mesmo. Un deles era andaluz, mentres que as dúas mozas restantes procedían de Italia.
Os tres compartiron boas impresións dos traballos que están a realizar no carreiro desde mediados de mes. Nesta edición do campo de traballo conviven nove participantes de distintos puntos de España e Europa. "Atopei en redes sociais a existencia da asociación e a experiencia que ofrecían e non dubidei en participar", dixo Giulia Franchi, voluntaria italiana.
A actividade pretende promover unha experiencia complementaria a varias materias. É por iso que a gran maioría de participantes son estudantes que xa finalizaron ou están a piques de acabar as súas carreiras. A edición deste ano terminará a finais de mes.
