domingo. 07.06.2020 |
El tiempo
domingo. 07.06.2020
El tiempo

O cartel lácteo prexudicou a 8.700 gandeiros de Lugo

Roberto García, secretario xeral de Unións Agrarias. EP
Roberto García, secretario xeral de Unións Agrarias. EP
Unións Agrarias calcula que as sete industrias que pactaron prezos deberán indemnizar con 63.000 euros de media a cada explotación

A maior parte dos 8.700 gandeiros lucenses que estaban operativos no ano 2001, como titulares de 3.060 explotacións afectadas, terán opción de reclamar compensacións a sete industrias polas súas prácticas ilegais ao pactar prezos do leite. O litixio abarca as vendas desde ese exercicio ata o 2013, ambos os incluídos.

Nese período, a produción de leite na provincia de Lugo alcanzou un importe de 4.327 millóns de euros. Esta cifra puido ser superior se as prácticas anticompetitivas de industrias que operaban en Galicia non imposibilitasen aos gandeiros a percepción de algo máis de 141 millóns de euros. As perdas causadas a cada explotación roldarían os 63.000 euros, se se calcula o prexuízo causado en 0,03 céntimos por litro, un dez por cento do seu prezo.

O secretario xeral de Unións Agrarias (UU.AA.), Roberto García, destacou que son xa 1.800 os gandeiros galegos, xunto a outros de Castilla y León, que se sumaron á demanda colectiva promovida por este sindicato. UU.AA. denunciou en 2011 ao cartel lácteo ante a Comisión Nacional dos Mercados e da Competencia en 2011, que fallou ao seu favor en 2019. O sindicato tamén fixo unha reclamación sobre as prácticas da distribución, "que utiliza o leite como reclamo", pero esta última parte da demanda non foi aceptada.

García recordou que os servizos xurídicos do seu sindicato é o único con acceso á documentación do proceso na Audiencia Nacional, onde presentou un recurso o cartel do leite. Tras o fallo de Competencia, que multou con case 80 millóns ás industrias, abriuse un prazo para que presentasen reclamacións os gandeiros prexudicados, que termina o 11 de xullo. Este litixio activarase ante o previsible fallo en contra da Audiencia ao contencioso.

O importe a reclamar polos gandeiros de toda Galicia ascende a 315 millóns de euros, dos que 97.400.100 se lles piden a Capsa; 75.234.600 a Lactalis; 68.965.050 a Puleva; 28.145.250 a Pascual; 24.350.025 a Danone; 19.619.775 a Nestlé, e 1.518.000 euros a Celega, á que só se lle incluíu neste pacto en 2013.

Félix Porto, asesor de Unións, precisou que poderán demandar tanto gandeiros en activo como xubilados, sen arriscar nada nin para ningún anticipo.

O cartel lácteo prexudicou a 8.700 gandeiros de Lugo
comentarios