A deputada autonómica Elena Candia foi reelixida este domingo como presidenta do PP de Lugo con máis do 98% dos apoios dos compromisarios. Desde o Congreso Provincial, celebrado no polideportivo de Outeiro de Rei, chamou a conseguir "maiorías absolutas" nas eleccións municipais de 2023 para gobernar en concellos e na Deputación.
"Temos que convencer de xeito esmagador, porque só podemos gobernar cando temos maioría absoluta. Non porque perdamos, senón porque se xuntan os perdedores e non nos deixan gobernar", censurou, durante a súa intervención.
A exalcaldesa de Mondoñedo e tamén expresidenta da Deputación conseguiu o apoio de 716 compromisarios, o 98,21% dos 729 que acudiron a este conclave, tal e como proclamou o presidente do Congreso, o senador José Manuel Barreiro.
Candia estivo nesta cita rodeada de cargos do partido en Galicia como o seu presidente, Alberto Núñez Feijoo; o presidente do Parlamento galego, Miguel Ángel Santalices; o portavoz parlamentario, Pedro Puy; e os líderes provinciais Alfonso Rueda (Pontevedra) e Manuel Baltar (Ourense). A listaxe completouse coa presenza da vicesecretaria de Organización do PP a nivel estatal, Ana Beltrán.
A recentemente reelixida líder dos populares lucenses non dubidou en expresar que estaba "enormemente agradecida" polo "importante caudal" de respaldo que recibiu, moi lonxe dese case 60% de 2016, cando tivo que competir polo liderado con Raquel Arias.
Intentando conter a emoción, quixo acordarse da súa familia, das súas "orixes humildes" e de todos os militantes, ademais de non pasar por alto a figura do falecido Francisco Cacharro e todo o traballo realizado polo que fose presidente da Deputación de Lugo a favor do campus. Tamén recordou as máis "3.000 visitas" que recibiu no seu despacho da sede do partido en Lugo nestes cinco anos.
"Pertenzo a este partido político desde 2003, dediqueille os mellores anos da miña vida. Este partido deume grandes alegrías, algún desgusto. Deume moi grandes amigos, tamén algún inimigo, pero porque me considerará o", presumiu.
Candia deslizou que "entrar en política era un acto de compromiso coa sociedade, e non leva máis obxectivo que intentar mellorar a sociedade que me rodea". "Ninguén me regalou nada", soltou.
