A alcaldesa de Mondoñedo e portavoz en funcións do PP na Deputación de Lugo, Elena Candia
Ademais, a popular considera que o presidente en funcións, Darío Campos, "non está a adoptar ningunha decisión de futuro porque sabe que ten os días contados" tras a designación por Ferraz do alcalde de Monforte, o socialista José Tomé, como candidato á presidencia da Deputación.
Neste contexto, a persoa que asumiu a presidencia da xestora do PSOE de Lugo é o secretario de Organización do PSdeG, José Antonio Quiroga. E sobre el Candia apunta que "tampouco vai ter presenza na Deputación" ao non ter "a condición de concelleiro". "É unha situación peculiar", lamenta.
BURELA. Un factor que pode influír na constitución da Deputación é a repetición de eleccións nunha mesa de Burela que ordenou o Tribunal Superior de Xusticia de Galicia. Candia interpreta que será a xunta electoral de zona, neste caso de Mondoñedo, a que decidirá sobre esta continxencia de seguir coa constitución ou paralizala ata despois da repetición en Burela. No segundo dos casos estima que probablemente non se conforme o pleno ata novembro.
Sexa como sexa, a tamén presidenta do PP en Lugo puntualizado que "a lei permite que se constitúa a Deputación, pero os edís do concello onde teñen que repetir non poderían optar a ser deputados, o cal pode interpretarse que pode afectar a un dereito fundamental dos mesmos". "Estamos á expectativa da resposta que dea o órgano competente que é a xunta electoral de zona, en todo caso [a constitución da Deputación] non antes do 5 de xullo que é cando se constitúe Monterroso", sinalou.
Elena Candia apela a que a lei "non" é tan clara, porque "por unha banda di que teñen que estar constituídos todos os concellos e, doutra banda, di que se por unhas circunstancias se anulase algún proceso electoral non se impedirá a constitución da Deputación, e isto é o que di a lei electoral". Unha norma que en opinión de Candia "bordea a legalidade en canto aos dereitos fundamentais dos concelleiros se refire". "Se se constitúe a Deputación sen estar concluído o proceso electoral que hai que repetir en Burela e sen estar constituída a corporación dese municipio iso implica que ningún dos concelleiros de Burela podería ser deputado provincial", sinala.
