O presidente da Deputación de Lugo, Darío Campos, asegurou que "fronte á mediocridade da oposición", os membros do goberno provincial socialista fan "política" para construír e para pór a disposición dos lucenses "o que é seu", pero non "para facer espectáculo nin ruído".
Campos fixo estas declaracións durante a súa intervención no pleno da Deputación, xusto despois de que a iniciativa do Partido Popular e só cos votos dos seus deputados saíse adiante unha proposta para reprobar a súa xestión.
"A reprobación é a dinámica na que está instalada a oposición do Partido Popular na Deputación de Lugo", engadiu, porque se "a fiscalización" ao goberno é a función primordial dos grupos que non forman parte do executivo, na institución provincial "converteuse nunha crítica permanente".
Desde o seu punto de vista, "a política debería contar cos máis responsables para exercela, estar arroupada por discursos certos e honestos, relatos construtivos e descritivos", pero nunca estar centrada "nos intereses electorais dunha organización política ou, o que resulta aínda máis mezquino, dunha persoa" concreta.
Segundo o presidente da Deputación, "os máis bisoños converteron a política nunha cuestión aritmética", de modo que "só lles importa o inmediato, o visible" e "as consecuencias a curto prazo".
Nese sentido, aparecen "a mediocridade, a inquina e a malicia disfrazadas de política", baixo "a perversa máxima de que todo vale", sen decatarse do "dano que esa farsa lle fai á política de verdade".
"Non vin á política a facer espectáculo nin ruído, vin construír para todos os veciños e veciñas. Desde que son presidente, só me propuxen sacar adiante iniciativas que lle permitisen a esta provincia sobrevivir, polo menos", ao "desprezo das políticas de dereitas do Partido Popular", engadiu, exercidas tanto "desde a Xunta como desde o Goberno central".
De acordo co seu relato, o goberno socialista fixo que a Deputación se convertese "no motor económico e social da provincia, pois en dous anos e medio" foi capaz de inxectar "máis de 129 millóns de euros", así como de liderar o investimento en obra pública, cun gasto de 55 millóns de euros.
Para impulsar "o estado do benestar" en Lugo, recordou, a Deputación gastouse 31 millóns de euros, coa creación de 1.500 novos postos de traballo e 10.00 prazas de teleasistencia gratuíta e de servizo de axuda a domicilio, ademais de investir 28,5 millóns para dinamizar social e economicamente a zona rural, "fomentando o turismo e a cultura" con máis de 1.700 iniciativas e colaborando con máis de 500 colectivos.
Sen esquecer, destacou, que a de Lugo é a primeira Deputación de Galicia e a terceira de España no que se refire ao investimento en deportes, cun gasto de 15 millóns de euros para ofrecer axudas a 2.500 equipos lucenses.
"O traballo deste goberno, coa inestimable colaboración dos traballadores públicos, aos que o Partido Popular castigou sen razón, supuxo que esta administración sexa hoxe o corazón da provincia, unha Deputación coas persoas, sumamente social e rural", resolveu.
En clara alusión ao Partido Popular, insistiu en que "circunscribir a política exclusivamente á consecución de maiorías leva a que a ideoloxía, os programas e a esencia da propia política se desprazase a un plano residual, cando deberían ser, precisamente, o máis importante".
De feito, lamentou que o que "para uns é unha inmoralidad", para outros, que puxeron encima da mesa unha relación deshonesta entre algúns políticos e a cidadanía", é "a normalidade".
Campos rexeitou de forma contundente a existencia dunha parálise política na Deputación, un dos argumentos que expuxo o Partido Popular para formular o seu reprobación, e recordou que desde a súa chegada á presidencia da institución non deixou de tomar "decisións cando debía tomalas", aínda que algunhas foran, "por certo, pouco agradables".
Para tomar ese tipo de decisións, insistiu, tivo que "pesar a responsabilidade e o rigor por encima das comodidades".
