O proceso de cambio de frecuencias de televisión dixital terrestre (TDT) arrinca este mércores en 58 municipios da provincia de Lugo. O cambio non implicará a aparición nin desaparición de canles de televisión, que só se desprazan, nin a obsolescencia de televisores nin descodificadores.
Nalgúns edificios non será necesario adaptar as instalacións de recepción de televisión, mentres que nos que sexa preciso facelo os propietarios non terán que asumir custos, xa que poderán solicitar as axudas do Goberno.
Durante o cambio de frecuencias de TDT, co fin de facilitar a transición e minimizar o impacto para os veciños, as cadeas de televisión emitirán simultaneamente a través das frecuencias nova e antiga. Esta emisión simultánea terá unha duración de entre catro e seis meses na maior parte dos municipios e de tres meses nalgúns.
Na provincia de Lugo, 8.312 edificios, nos que residen 130.006 persoas, terán que adaptar as súas instalacións. A medida non afectará de momento a municipios que reciben o sinal de televisión da área xeográfica de Ourense. Do cambio vese exento Muras, incluído na área xeográfica de Coruña Norte.
O cambio de frecuencias non afectará por igual a todos os edificios. En concreto, deberán realizar adaptacións os edificios comunitarios de tamaño mediano ou grande que estean equipados con sistemas monocanales ou central programables. Independentemente do tipo de equipo de recepción de sinal dos edificios, todos os cidadáns deberán resintonizar os seus televisores para poder gozar da oferta completa de TDT unha vez que finalicen os "simulcast", cara a finais de xaneiro de 2020.
