A borrasca Efraín deixa preto de 300 incidencias por vento e choiva en Galicia

O 112 Galicia contabilizou este luns un total de 262 incidencias relacionadas coa borrasca Efraín, que deixou choivas de máis de 60 litros por metro cadrado que provocaron inundacións, e fortes ventos, con refachos que chegaron a ser de 147 quilómetros por hora en Carballeda de Valdeorras. En todo caso, ningunha destas intervencións representou "unha situación grave para as persoas", segundo explicou a central de urxencias.

A maioría das incidencias estiveron relacionadas coa caída de árbores, ramas e outros obstáculos, como restos de accidentes ou algunha bolsa de auga que puideron provocar alteracións na circulación nas vías de Pontevedra e Ourense, fundamentalmente.

A provincia de Pontevedra foi a máis afectada, sobre todo polas fortes choivas, e en Lugo, aínda que houbo moitas precipitacións e vento, non se rexistraron incidentes notables. A excepción foi Monforte, onde traballadores dunha clínica de diálese solicitaron axuda ao comezar a alagarse as instalacións. O problema estaba nun rexistro da rede de saneamento interior da clínica, segundo sinalaron os bombeiros, que o desatascaron.

O forte vento obrigou a suspender voos no aeroporto vigués de Peinador e a desviar outros a Compostela

O GES de Monterroso tivo que atender tamén varias urxencias relacionadas co temporal, sobre todo á primeira hora da mañá. En cálea Doutor Pereiras Espiño, da localidade monterrosina, as fortes choivas provocaron unha inundación nun dos baixos, xerando danos no local. Ademais, durante toda a mañá os efectivos tiveron que desatascar os sumidoiros ao paso da N-640 pola localidade.

En Galicia, as precipitacións máis abundantes rexistráronse en Lousame, na Coruña con 67,7 litros por metro cadrados, mentres en Pontevedra alcanzáronse os 66 litros en Tui e 64 nas localidades ourensás de Avión e Entrimo.

Na provincia de Pontevedra, un dos puntos onde se produciron máis incidencias debido ás precipitacións foi Vilagarcía de Arousa, onde houbo danos na escola infantil e alagáronse varias vías e houbo que cortar outras ao tráfico, o que tamén sucedeu en Cea, polo desprendemento dun muro. Tamén se rexistraron inundacións en Caldas e en Cuntis, así como en Ribeira. Nesta localidade coruñesa, alagouse un centro escolar situado na parroquia de Carreira.

#EnVídeo Unha tapa de sumidoiro levantouse na Avenida de Rosalía de Castro da #Vilagarcía as copiosas precipitacións pic.twitter.com/kg7xngVroy<> — Diario de Pontevedra (\Diario_Pontev) December 12, 2022<>

En canto ao tipo de incidencias xestionadas, o 112 detallou que as que máis se repetiron foron as caídas de árbores e a acumulación de auga en estradas, rúas e vivendas case a partes iguais, así como as intervencións dos equipos de urxencias para evitar males maiores.

Por outra banda, o 112 Galicia tamén destacou que durante a mañá do luns contabilizou 43 accidentes de tráfico, aínda que non todos tiveron vinculación directa coa situación meteorolóxica. A maioría deles, sinalou, saldáronse sen feridos.

O vento, protagonista

O vento foi intenso durante a xornada, con refachos en numerosos puntos de máis de 100 quilómetros por hora. Ademais dos 147 quilómetros por hora de Carballeda de Valdeorras, houbo refachos de120 km/h en lugares como Castro Vicaludo, no municipio pontevedrés de Oia (127,5 km/h) ou na Gándara, no concello coruñés de Vimianzo (125 km/h).

• A choiva volverá caer con forza este martes en Galicia<>

A choiva e o vento provocaron que varios voos con destino ao aeroporto de Peinador de Vigo fosen desviados. En concreto, un avión procedente de Madrid foi desviado a Santiago de Compostela e os seus pasaxeiros foron desprazados por estrada para finalizar o traxecto a Vigo. Os viaxeiros do seguinte voo a Madrid desde Vigo foron trasladados tamén en autobús á capital galega para coller o voo en Lavacolla, debido a que o seu avión estaba alí. Ademais, outro voo que partiu de Barcelona na mañá deste luns foi desviado a Madrid, ao non poder aterrar en Vigo tamén polo vento.

Un terceiro voo procedente de Madrid con destino Vigo que partiu da capital ás 11,45 horas foi desviado a Santiago e foi cancelado a chegada do de Madrid a Vigo das 13.,00 horas.

No mar a situación tamén se complicou e a naviera Mar de Ons suspendeu o transporte entre Cangas e Vigo debido ás malas condicións meteorolóxicas.