O delegado territorial da Xunta en Lugo, José Manuel Balseiro, afeou ao goberno bipartito da Deputación Provincial -conformado por socialistas e nacionalistas- a súa intención de traspasar á administración autonómica a xestión das residencias da terceira idade. "Non saben que facer con elas e queren que agora a Xunta faga o seu traballo", indicou Balseiro.
O delegado da Xunta quixo recordar que "en campaña electoral estiveron incluso prometendo máis residencias, ata asinando convenios con concellos como Cervantes e Ourol, e agora din que as colla a Xunta". "Deberían pedir desculpas polo espectáculo, sobre todo aos veciños destes dous concellos que seguramente quedarán sen residencia", apuntou.
En referencia ao que fixeron os socialistas "desde 2010" en materia de residencias, o delegado territorial indicou que "abriron tres e o 80% restante nin sequera pediron o PIA -Permiso de Inicio de Actividade- á Xunta".
Balseiro tamén sinalou que "o principal problema das residencias da Deputación é que se fixeron en base a un criterio partidista, en concellos con gobernos socialistas e sen seguir cuestións técnicas".
O delegado da Xunta tamén quixo referirse aos "señores do Bloque", instándoos a dicir "o que queren facer", dado que "por agora sabemos soamente o que queren desfacer". Finalmente, Balseiro pediulles a ambos os partidos que "sexan serios con este tema", do que dependen moitas persoas da provincia de Lugo.
