Tras a eclosión inicial rexistrada hai tres anos, a raíz do decreto regulador das vivendas de uso turístico (VUT) publicada pola Xunta, as altas deste tipo de aloxamentos crecen a un ritmo lento, pero continuo, na provincia de Lugo. En 2017 houbo un aluvión de inscricións, case 900, polo afán de regularizar pisos nesta modalidade de aluguer. Desde entón produciuse un goteo ata chegar ás 1.328 actuais. A Mariña concentra a maior parte da oferta, con 1.011. En Lugo capital a cifra é de 110.
Máis aló do seu paulatino crecemento, estas vivendas para viaxeiros convertéronse nun referente no mercado vacacional, no que suman 5.300 prazas, se se estima unha media de catro camas por vivenda. Aínda que o seu papel é complementario ao dos restantes establecementos turísticos, o volume de camas ofertadas non está lonxe das 6.500 dos 144 hoteis lucenses e supera ao número de pensións, albergues, apartamentos ou casas rurais.
O fenómeno deste tipo de aluguer é moi inferior na provincia de Lugo se se lle compara con Pontevedra, que reúne case a metade da oferta galega, con 4.519 pisos fronte aos 9.972 rexistrados en toda a comunidade. Por detrás está A Coruña, con 3.714 vivendas, Lugo, e Ourense, con só 362 pisos.
As VUT son pisos ou casas unifamiliares illadas que se alugan na súa totalidade, e non por cuartos, cun número de prazas non superior ás dez persoas e sen servizos complementarios. "Diferéncianse dos apartamentos turísticos porque estes últimos son inmobles integrados en bloques de pisos ou en conxuntos de unidades aloxativas que estean destinadas na súa totalidade ao aloxamento turístico", segundo explica a xefa do servizo provincial de Turismo, Paloma Vázquez.
Como no resto de Galicia, as VUT abundan nos municipios costeiros. Foz (293), Barreiros (291), Ribadeo ou Viveiro, ambos con 124, lideran un ranking onde se asoma O Vicedo, con 47. A Ribeira Sacra, un dos geodestinos de referencia da provincia, suma un total de 102. Monforte dispón de 31, seguido de Pantón e Sober, con 17.
Foz e Barreiros sobresaen polo número de camas, cunhas 1.170 en cada municipio, aínda que lonxe das cifras de Sanxenxo, con 1.728 vivendas de uso turístico e unhas 7.000 prazas.
NORMATIVA. Pomba Vázquez recorda que o Tribunal Supremo ratificou a lei ditada pola Xunta, que prohibe o arrendamento por de as VUT por habitacións. "A norma trata de evitar unha competencia desleal cos hostais e pensións, sometidos a unhas esixencias máis ríxidas". O Supremo emitira unha sentenza que invalidaba artigos do decreto do Goberno galego, e permitía o aluguer por cuartos. O Executivo autonómico presentou un expediente de nulidade e os maxistrados déronlle a razón.
As VUT deben alugarse dúas ou máis veces ao ano por períodos inferiores aos 30 días. Os clientes valoran que son unha forma de aloxamento máis económico que outros convencionais. Así se desprende dos comentarios aparecidos en plataformas de aluguer. Resultan máis cómodas a familias, que son as que máis as utilizan, parellas e persoas que viaxan en grupo, segundo o Barómetro do Aluguer Vacacional en España, elaborado pola plataforma Homeaway e a Universidade de Salamanca.
O Camiño Francés ten neste caso unha elevada influencia. Así, Sarria conta con 70 establecementos, mentres que Pas, con 55, está á altura de Ribadeo, con 56, ou Lugo con 53. Mención aparte recibe o caso de Portomarín, con 43 establecementos, e unhas 1.300 camas. Tamén destacan O Cebreiro e Triacastela, con 28 e 22 aloxamentos. Unha das tendencias dos últimos meses é a maior tramitación de solicitudes para a creación de albergues no Camiño Norte, con tres solicitudes en Ribadeo, e no Primitivo, con peticións en A Fonsagrada, Lugo e Friol. No Francés hai unha solicitude en trámite en Pas.
A figura do albergue naceu no ano 2003 e desde entón experimentou unha notable evolución.
Outro aspecto destacado son os 23 aloxamentos, aos que hai que engadir tres vivendas turísticas, rexistradas en O Courel. O geoparque Os Ancares-Courel é un dos geodestinos que máis creceron en Galicia no último ano, segundo os datos da Consellería de Cultura e Turismo, e iso reflíctese tamén no número de negocios neste municipio.
