O Consello de Ministros, na súa reunión deste martes, autorizou ao Ministerio de Transporte, Mobilidade e Axenda Urbana, a través de Adif, a licitar o contrato para a construción das obras da subestación eléctrica de Oural, en Sarria, e os centros de autotransformación para a electrificación do tramo de vía férrea Ourense-Monforte de Lemos-Lugo.
O contrato, cun valor estimado de licitación de 15.229.304,4 euros, contempla as obras e instalacións necesarias para pór a funcionar a subestación eléctrica de tracción de Oural, así como os centros de autotransformación asociados no tramo de vía que comunica Lugo e Ourense, a través de Monforte.
Segundo informa o propio Ministerio nun comunicado, o "obxectivo" dese contrato é "conseguir electrificación do tramo ao sistema 2x25Kv".
“Esta actuación, enmarcada nas actuacións deseñadas para a mellora da liña, persegue o obxectivo de modernizar de forma significativa o estado da infraestrutura actual e seguir así potenciando a competitividade da rede ferroviaria galega”, engade.
A primeira das dúas fases do contrato fai referencia ao tramo entre Monforte de Lemos-Lugo, coa construción da subestación de tracción en Oural, un centro de autotransformación final e cinco centros de autotransformación intermedios.
Nesta fase, o contrato tamén contempla a construción da obra civil dos equipamentos exteriores, a plataforma e o edificio para o equipamento de alta e baixa tensión da subestación, a construción de camiños e plataformas de acceso á mesma e a subministración e montaxe dos servizos auxiliares.
A segunda fase céntrase no tramo Ourense-Monforte de Lemos e inclúe a construción dun centro de autotransformación final ou de zona neutra, un intermedio e a instalación de dous conxuntos de centros de transformación para a subministración de enerxía ás instalacións de seguridade do traxecto, nas estacións de strong <>Os Peares e Canabal.
Nesta fase, o contrato tamén se centra na execución das estruturas de aceiro e obra civil para os equipamentos exteriores, canalizacións de cable de retorno, montaxe tanto de material eléctrico como de control e a subministración dos servizos auxiliares, entre outras actuacións.
"O principal beneficio desta actuación é a notable vantaxe ambiental da tracción eléctrica fronte ao diésel, xa que require de menos enerxía primaria, en torno ao 25 por cento menos, e dun 45 por cento menos de enerxía procedente de fontes fósiles e, polo tanto, non renovables", aclara o Ministerio.
Ademais, a tracción eléctrica produce "menos emisións de gases de efecto invernadoiro e axuda a aumentar a seguridade nas circulacións xa que evita o transporte de combustibles inflamables nos tanques das máquinas de tracción", conclúe.
