O estado das estradas lucenses non deixa de provocar as queixas dos condutores de norte a sur da provincia. Ás últimas reclamacións polas fochancas que abundan na N-VI a A-6, a N-634, a N-640 ou a N-642 ou pola falta de solucións aos problemas coa néboa na A-8, súmase agora o descontento polo mal firme da N-540, que une Lugo con Ourense, e da N-547, especialmente ao seu paso polo municipio de Palas de Rei.
A principal vía que conecta as capitais lucense e ourensá, pola que circula unha media de 4.000 vehículos ao día, presenta un estado "lamentable", segundo os condutores que se enfrontan a ela habitualmente. "O tramo de Lugo está moito peor que o de Ourense", explicaba este martes unha usuaria en declaracións a TVE.
Incluso existe unha petición na plataforma Change.org, con xa máis de 4.000 firmas, na que se reclama ao Ministerio de Fomento que actúe. "O seu firme atópase nun estado lamentable, poñendo en perigo a seguridade dos seus usuarios. A gran cantidade de fochancas e desconchados deteriora os pneumáticos e sistemas de amortiguación dos vehículos e afecta notablemente á seguridade na condución. O recheo das fochancas que fai periodicamente o persoal de mantemento aguanta moi pouco e ten ademais un efecto negativo: a grava miúda que solta rompe con frecuencia focos e parabrisas", indica o impulsor desta petición.
UN INFERNO EN PALAS. A situación é parecida á que se rexistra noutra estrada do sur da provincia: a N-547, que vai de Guntín ata o municipio coruñés do Pino. Fochancas e grava miúda desprendida son dous dos problemas habituais cos que teñen que lidar os 3.000 usuarios diarios desta vía ao seu paso polo municipio de Palas de Rei. As consecuencias: frecuentes danos en rodas e na amortiguación dos vehículos.
Deste mesmo concello parte a estrada LU-231, que une Palas e Friol e cuxo estado foi obxecto de críticas por parte do BNG este luns. Neste caso as queixas van dirixidas á Xunta, que, segundo os nacionalistas, anunciou no ano 2010 un investimento de 32 millóns de euros na conexión Palas (A-54) - Friol – Begonte (A-6). "A día de hoxe non se fixo nada", lamentan.
