Ascenden a dez os usuarios da residencia de Outeiro de Rei hospitalizados

En total son 40 os maiores contaxiados de Covid-19 
Residencia de mayores DomusVi de Outeiro de Rei. XESÚS PONTE
photo_camera Residencia de maiores DomusVi de Outeiro de Rei. XESÚS PONTE

Dez dos corenta usuarios da residencia de anciáns de Outeiro de Rei que deron positivo por Covid-19 foron ingresados no Hospital Universitario Lucus Augusti (Hula) "por precaución", tendo en conta de que todos eles presentan "patoloxías previas". 

Segundo informaron fontes da propia Xunta de Galicia, o ingreso deses pacientes débese á necesidade de que sexan sometidos a un "seguimento médico máis exhaustivo", como consecuencia desas patoloxías previas, mentres que os demais residentes afectados mantéñense "estables".  De acordo co último reconto realizado polo Sergas, nestes momentos hai 40 residentes afectados e tamén deron positivo cinco traballadores.

Ademais, as mesmas fontes aclaran que o feito de que todos os infectados residan nunha área concreta do edificio está a permitir realizar un "mellor seguimento" da súa evolución.

Conforme ao protocolo de prevención establecido para evitar novos contaxios, os demais residentes seguen illados nos seus dormitorios e as instalacións seguen pechadas a visitas externas. 

Comentarios