Crece o número de casos de coronavirus que afectan a escolas infantís e centros de educación non universitaria en Galicia. Os datos divulgados este mércores pola Xunta sitúan o total en 486, que son 65 máis dos computados no último informe, publicado o sábado. Con todo, hai unha excepción no mapa galego, porque nos colexios da área sanitaria de Lugo —que se corresponde coa provincia— os positivos reducíronse, a 18. Ademais, non teñen aulas pechadas.
Os positivos de Lugo son nove menos que os apuntados no final da semana pasada, e están repartidos entre un total de 17 centros. E é que seis instalacións saíron da lista das afectadas: dous en Castro de Rei (CEIP Veleiro-Docampo e IES da Terra Chá) e catro en Lugo (CEIP de Casás, CEIP Menéndez Pelayo, CEIP Sagrado Corazón e IES Nosa Sra. dos Ollos Grandes).
A maiores, catro centros viron reducidos os casos e teñen agora só un. Son, en Lugo, o CPR Fingoi, o CPR Plurilingüe Padres Franciscanos e o IES Lucus Augusti, e o CPR Plurilingüe La Merced en Sarria.
Mentres, un colexio sumou un novo positivo ao que xa tiña (o CEIP Xoán de Requeixo de Chantada) e outros dous incorporáronse á lista. Son o CEIP Paradai de Lugo e, tamén na capital, a EI municipal Gregorio Sanz, a única escola infantil da provincia afectada.
Continúa pechada unha gardería en Celanova e hai 23 aulas clausuradas en toda a comunidade
No conxunto de Galicia, os colexios, institutos e escolas infantís achéganse ao medio milleiro de positivos, e hai 23 aulas pechadas. As áreas máis afectadas son as de Ourense, A Coruña e Santiago.
A situación máis complexa séguese dando en Ourense, con 181 positivos —23 máis que o sábado—, que obrigaron a pechar as instalacións da escola infantil María Ana de Celanova. É o segundo caso de clausura no que vai de curso debido ao covid-19, tras o do Calasancio de Pontevedra.
Dentro desta área sanitaria destacan o incremento de casos no Carballiño e o propio municipio das Burgas, como os focos de maior incidencia en centros da provincia. No primeiro caso, dous centros suman xa oito positivos cada un, mentres que na capital da provincia a situación máis preocupante rexístrase no CPR Santa Teresa de Jesús con 10 contaxios; María Auxiliadora, con 8, e o Santo Ángel e o Luís Vives, afectados por oito e sete positivos, respectivamente.
No área de Compostela, mentres, hai 17 positivos máis que o sábado, con novos casos confirmados en centros de Ames, Boimorto, Muros, Ribeira, Santiago e Teo.
