As asociacións de nais e pais de alumnos de Baamonde (Begonte), O Courel, Navia de Suarna e Baralla decidiron unirse na plataforma Anpas no rural para lanzar "un berro de dignidade" que chame a atención sobre un "problema común", que "non é outro que o continuo goteo de peches de servizos" no ámbito rural.
"Esta plataforma nace co afán de colaborar, na medida do posible, na divulgación" da "realidade" en contornas rurais, "fronte ao relato que escoitamos por parte da Xunta de Galicia", que, segundo asegura o colectivo, "admite que son xestoras alleas á nosa terra quen está a deseñar as medidas a aplicar nela".
Nese sentido, as asociacións que integran esta plataforma pregúntanse "como vai unha xestora de Madrid, ou incluso de Santiago, a coñecer desde o seu despacho a realidade da Montaña de Lugo ou da Terra Chá". "Mentres os nosos políticos asinan coa man dereita a lei de impulso demográfico, coa esquerda seguen pechando máis e máis colexios" en municipios rurais, como se propuxo para Baamonde.
Quéixanse, ademais, de que aqueles centros que permanecen abertos son "tan precarizados" que acaban por ser "inviables" de facto, como "sucede no caso do Courel, Navia ou Baralla", onde "o recorte no transporte escolar obriga aos nenos a pasar horas interminables en autobús por zonas de difícil acceso para ese tipo de vehículos".
Lamentan que "os nenos do rural levan anos perdendo servizos, por ser considerados números" e subliñan que "o investimento en educación non pode considerarse un gasto", porque "o fin da escola é o inicio do fin das comunidades rurais".
