O número de casos de coronavirus na provincia de Lugo crece con respecto á semana pasada, pasando de 156 a 198, e nalgúns concellos, como os de Trabada ou Meira, a situación é preocupante con vistas á reunión deste martes do comité clínico da Xunta, na que se decidirá en que nivel de restricións estará cada concello.
Lugo conta con 39 concellos libres de covid, tres máis que a semana pasada, mentres que cun só caso hai oito, tres menos que hai sete días.
Desde o anterior reconto baixa o número de casos en 13 concellos, mantense igual en 36 e crece en 18. En moitos deles, o aumento é pouco significativo, pero noutros o suficiente como para acender as alarmas. é o caso, sobre todo, de Trabada e Meira, que se atopaban no nivel medio de restricións (con incidencia entre 150 e 250).
Trabada pasa de 6 a 9 casos nunha semana. Eses 9 casos tradúcense nunha incidencia de 709, polo que todo apunta a que entrará no nivel máximo de restricións, reservado para os concellos cunha incidencia superior a 500.
Precisamente este domingo realizouse en Trabada un cribado entre alumnos e persoal docente do centro de primaria a localidade, no que non se rexistrou ningún positivo.
Meira tamén podería entrar no nivel máximo, que implica o peche perimetral do concello, a prohibición total de reunións de non convivientes en calquera ámbito, e que a hostalería só poida servir a domicilio ou para recoller.
E é que o número de casos en Meira crece de 4 a 9 con respecto á semana pasada, o que se traduce nunha incidencia de 514.
O pasado sábado realizouse un cribado en Meira ao que estaban citados 400 veciños e ao que acudiron 385. Detectáronse 4 positivos e o Sergas informou de que xa se puxeron con contacto cos seus contactos estreitos tomar as medidas oportunas e evitar que os contagios crezan.
Talvez derivado da proximidade con Meira, Ribeira de Piquín, un dos concellos que habitualmente forma parte da lista daqueles libres de covid, presenta esta semana un caso.
Barreiros, que se atopaba no nivel alto de restricións (incidencia entre 250 e 500) experimentou un crecemento de positivos na última semana, de 6 a 9, polo que, cunha incidencia de 307, espérase que a súa situación non cambie tras a reunión do comité clínico da Xunta de Galicia.
Mellores noticias chegan desde A Pobra do Brollón, que nos últimos sete días pasou de 6 a 4 casos (incidencia de 245). De todos os xeitos, é moi probable que se manteña no nivel medio de restricións no que xa estaba.
Un dos aumentos de casos máis significativos que se rexistran é o de Quiroga, que hai sete días era un concello libre de covid e agora conta con 6 casos. Cunha incidencia de 189, podería entrar no nivel medio de restricións, sobre todo ante a posibilidade de que os casos aumenten debido á súa proximidade xeográfica, o que implica un alto nivel de interaccións, coa zona de Carballeda de Valdeorras, un dos concellos de Galicia máis afectados polo coronavirus e que se atopa no nivel máximo de restricións.
En Ribadeo pásase de 9 a 14 casos; é dicir, unha incidencia de 141, preto dos 150 que implican a entrada no nivel medio de restricións.
Tamén crece o impacto do coronavirus na capital provincial, que presenta 73 casos, 16 máis que hai sete días, e que abandona á situación de em <>meseta na que se atopaba desde mediados de abril.
En Monforte rexístrase un lixeiro aumento, de 9 a 13 de casos, como sucede en Vilalba, de 4 a 7; en Chantada, de 2 a 6; Burela, de 8 a 11, ou en Foz, de 8 a 9, pero a incidencia aínda é baixa como para que se acendan as luces de alarma; non así as da cautela. Para rematar cabe destacar a situación epidemiolóxica en Sarria, que tras un continuo descenso de casos é xa un concello libre de covid.
