Case 300 gandeiros da provincia de Lugo tramitaron xa a través da Asociación Agromuralla as súas respectivas reclamacións contra as industrias lácteas sancionadas pola Comisión Nacional dos Mercados e a Competencia (CNMC) por haberse posto de acordo no prezo de compra do leite en orixe durante os anos 2000 a 2013.
Agromuralla, unha asociación que agrupa a uns 400 gandeiros das provincias de Lugo e A Coruña, recorda que “as explotacións teñen agora dereito a solicitar o ingreso das cantidades non abonadas durante estes 14 anos como consecuencia da fixación de prezos á baixa por parte das distintas empresas de recollida”.
O prazo para presentar a reclamación e evitar que este dereito prescriba finaliza este sábado, 11 de xullo, xusto un ano logo da data da resolución sancionadora da CNMC, polo que Agromuralla está a animar “a todos aqueles produtores que aínda non inicien o procedemento, sexan socios ou non”, a tramitar a súa demanda.
O presidente de Agromuralla, Roberto López, recorda que "son os últimos días para que todos os gandeiros galegos que nos vimos prexudicados durante tantos anos polas prácticas irregulares levadas a cabo polas industrias lácteas podamos solicitar a devolución das cantidades que os produtores deixamos de percibir durante máis dunha década”.
Son, recordou, “importantes ingresos que son froito do noso traballo e esforzo, que nos pertencen e que temos dereito a recuperar".
O caso baséase na multa de 80 millóns de euros imposta en xullo de 2019 pola Comisión Nacional dos Mercados e a Competencia, o organismo que se encarga de investigar e sancionar prácticas ilícitas en materia comercial ou de libre mercado, a 10 industrias lácteas, ao detectar que empresas e asociacións do sector intercambiaron durante anos información para influír nos prezos e pagar menos aos gandeiros.
Agromuralla recorda que os gandeiros que reclamen poderían recuperar “un 10% da facturación polo leite vendido entre os anos 2000 e 2013”, ademais de precisar que “poden reclamar tanto os gandeiros en activo como os xubilados”.
