Os dous únicos parques zoológicos de Galicia, Marcelle e Avifauna, viven un presente complicado. á falta de ingresos derivados do peche das instalacións súmanse os gastos de alimentación e de coidado dos animais, así como os de mantemento de ambos os recintos, situados no municipio de Outeiro de Rei. A pesar diso, as administracións "mantéñennos no esquecemento", segundo Antonio Ibáñez, propietario de Avifauna.
A principal referencia dos donos de ambas as empresas á hora de obter información é a asociación nacional á que pertencen. "Imaxino que poderemos abrir as portas na terceira fase da desescalada, pero todo está sen definir", puntualiza Loli Guitián, de Marcelle Natureza. Ibáñez porá a punto Avifauna durante a semana próxima coa intención en abrir en xuño.
"Teño moitos animais e non podo tirar a toalla", asegura Ibáñez, que solicitou un crédito para esta travesía do deserto á espera da reapertura.
"Aquí a vida segue igual para os animais", asegura Loli Guitián. A primavera é unha época de partos e a actividade dos exemplares de especies con tendencia a invernar "é maior e necesitan máis comida. Houbo xente que se envorcou connosco. Empresas e particulares que achegaron pensos, palla ou froita", agregou.
"Non adoitamos cubrir nin o 20% dos 30.000 metros cadrados de superficie do recinto. A xente pode andar por aquí sen aglomeracións e as gaiolas sempre están desinfectadas"
Antonio Ibáñez tivo a sorte de adquirir antes do estado de alarma pensos de froitas e insectos, procedentes de Francia, para animais que necesitan unha alimentación especial que non é fácil de conseguir en Galicia.
Mentres as portas están pechadas, en Marcelle executan reformas para adaptar o recinto á nova normativa de seguridade e cartelería con advertencias, segundo manifesta Loli Guitián.
Desde Avifauna subliñan que o aforamento non é un problema. "Non adoitamos cubrir nin o 20% dos 30.000 metros cadrados de superficie do recinto. A xente pode andar por aquí sen aglomeracións e as gaiolas sempre están desinfectadas. Temos protocolos creados cando xurdiu a gripe aviaria. Ao ser un lugar ao aire libre, as medidas de protección son de fácil aplicación ", apostila Ibáñez.
Parte dos visitantes de Avifauna proveñen doutras provincias galegas ou de fóra da comunidade, "pero con maior ou menor mobilidade, queremos abrir e dar os primeiros pasos", sostén o seu responsable.
