A subdelegada do Goberno, Isabel Rodríguez, confirmou este mércores que Adif acaba de sacar a información pública novas expropiacións para executar dous proxectos de mellora de ferrocarril na provincia e que afecta a terreos dos municipios de Monforte, O Incio e Sarria. Ambos os anuncios publicáronse na edición deste mércores do Boletín Oficial do Estado.
O primeiro dos expedientes afecta a cinco leiras situadas no municipio de Monforte, que son necesarias para executar as obras de ampliación de gálibo en pasos superiores do tramo Ourense-Monforte-Lugo non afectado pola variante de San Xiao.
O segundo expediente de expropiación forzosa está motivado polas obras do proxecto de construción do túnel de Oural, situado no tramo Monforte-Lugo da liña 800 A Coruña-León.
Neste caso, as leiras afectadas pertencen aos municipios do Incio e Sarria.
En ambos os casos, as persoas interesadas poden presentar as alegacións que crean oportunas nun prazo de 15 días.