O Consello de Administración de Adif aprobou na súa última reunión a licitación do contrato para executar pechamentos na vía férrea ao seu paso por zonas urbanas e "pasos viciosos" no tramo Monforte de Lemos-Lugo, que pertence á liña León - A Coruña. A actuación, que conta cun orzamento de licitación de 6.816.170,15 euros, enmárcase no conxunto de melloras planificadas para o corredor Ourense-Monforte-Lugo.
Os traballos realizaranse integramente en terreos de titularidade de Adif, polo que non será necesaria a tramitación de expropiacións nin a reposición de servidumes ou servizos afectados. Este contrato forma parte das actuacións previstas polo administrador de infraestruturas ferroviarias para incrementar a seguridade nas estacións de viaxeiros e noutras contornas, tanto para os cidadáns como para as propias circulacións ferroviarias.
Con estes traballos, que consisten na construción de máis de 11.000 metros de muros de formigón e a colocación duns 18 quilómetros de malla metálica, preténdese mellorar os sistemas de protección da infraestrutura "para disuadir e evitar tránsitos indebidos polas vías".
A supresión e mellora de pasos a nivel en Lugo supuxo un investimento de 551.000 euros
As actuacións para mellorar o tramo en servizo Ourense-Monforte-Lugo, nas que se enmarca esta licitación, "teñen como obxectivo cumprir os compromisos de Adif coa optimización das condicións de explotación comercial do traxecto, en parámetros talles como a fiabilidade, o confort e os tempos de viaxe". En total, previuse unha investimento aproximado de 515 millóns de euros, a falta de que algúns proxectos entre Ourense e Monforte, que están actualmente en redacción ou supervisión, salgan a licitación.
