O pleno de organización da Deputación de Lugo aprobou por unanimidade a organización e retribucións dos tres grupos que forman a corporación provincial. O acordo previo que alcanzaron os tres partidos con representación (PSOE, BNG e PP) provocou que o pleno se convertese nun mero trámite de pouco máis de dez minutos, que permitirá a 17 dos 25 membros da corporación cobrar un soldo da institución.
O consenso alcanzado este martes nada tivo que ver co sucedido en novembro de 2015, cando o PP, co apoio do entón deputado socialista Manuel Martínez, impuxo ao anterior bipartito presidido por Darío Campos un drástico recorte de case 240.000 euros en soldos, ao eliminar a dedicación exclusiva do vicepresidente e a parcial do segundo deputado nacionalista.
Nesta ocasión o acordo foi total e non houbo debate, aínda que a administración local volveu engordar, xa que se gastarán uns 80.000 euros máis en pagar unha dedicación exclusiva e outra parcial máis que no anterior mandato.
Pero, sobre todo, a partida de salarios incrementarase notablemente coa chegada de dez novos asesores con relación a novembro de 2015. Deste xeito, o cadro de persoal eventual contempla 25 postos, o máximo que permite a lei, e que se traducen en dez máis que en 2015. Destes cargos de confianza, 15 corresponden ao PSOE, incluída a área de presidencia; sete ao BNG, incluída a vicepresidencia, e tres ao Partido Popular.
En canto aos salarios asignados, o presidente da entidade provincial cobrará 67.500 euros anuais, mentres que a vicepresidenta, a nacionalista Maite Ferreiro, percibirá 61.196 euros.
O presidente cobrará 67.500 euros anuais, mentres que a vicepresidenta percibirá 61.196 euros
DEDICACIÓNS. Entre todos os deputados do PSOE repartiranse un total de 281.952 euros anuais, distribuídos entre as cinco dedicacións exclusivas, de 53.613,14 euros cada unha, que recibirán Pilar García Porto, como responsable da área de regimen interior e turismo; Pablo Rivera Capón (promoción económica e social), Mayra Gómez Bermúdez (economía e facenda); Ana González Abelleira (formación e ensino), e Roberto Fernández Rico (recursos sostibles). José María Arias (cooperación cos concellos) e José Luis Raposo (medio ambiente) cobrarán sendas dedicacións parciais de 40.209,85 euros; mentres que Roberto García Penas (participación cidadá) e María Loureiro (muller e igualdade), cobrarán 26.806,57 euros pola súa media dedicación.
Por parte do BNG, Efrén Castro (deportes e artesanía) e Mónica Freire (medio rural e mar) tamén cobrarán dúas dedicacións exclusivas de 53.613,14 euros.
O PP gana unha dedicación parcial máis con relación ao anterior mandato, no que xa contaba con tres exclusivas, e que se repartirán entre a súa portavoz, Elena Candia, e os seus tres viceportavoces.
PLENOS ORDINARIOS. Entre os demais acordos alcanzados na sesión deste martes, a corporación provincial decidiu seguir celebrando os plenos ordinarios o último martes de cada mes e as xuntas de goberno, todos os venres.
A corporación custa 638.000 euros anuais en salarios.
"Se miran o resto de deputacións, como a de Ourense, que é a máis pequena de Galicia, o soldo do presidente sitúase ao redor dos 73.000 euros e nós deixámolo como estaba e non tocamos un céntimo", indicou.
Tomé tamén sinalou que o acordo alcanzado polos grupos da corporación garante que todos teñan "os medios suficientes para poder levar a cabo a súa función da mellor maneira posible e para prestar o mellor servizo aos concellos e aos cidadáns".
Elena Candia tamén anunciou que o seu grupo contará con tres viceportavocías, que estarán ocupadas polos deputados Javier Castiñeira, Agustín Baamonde e José Antonio García. "Entre os catro, distribuiremos as áreas de goberno para facer un intenso control e fiscalización, xa que este goberno conta con medios se precedentes nesta institución para facer un bo traballo", insistiu.
