A entidade financeira Abanca e a Mancomunidade de Concellos Galegos do Camiño Francés asinaron este martes un acordo en Portomarín co que se persegue facilitar a compra e rehabilitación de vivendas ao longo desta variante da ruta xacobea, así como fomentar a actividade empresarial, impulsando a posta en marcha de novos negocios.
Este plan, denominado Rehabilita ou Camiño Francés, incorpora produtos de crédito máis vantaxosas con relación ao que adoita ser habitual no mercado. Ofrece así distintas modalidades de hipoteca con condicións melloradas para aquelas persoas interesadas en adquirir ou rehabilitar unha vivenda na ruta xacobea ao seu paso por calquera dos concellos que forman parte da Mancomunidade.
Abanca tamén habilitou unha liña de préstamos persoais de ata 60.000 euros a dez anos, sen comisións de estudo, amortización ou cancelación anticipada para quen necesite realizar obras de reforma na súa vivenda habitual. Esta solución está pensada, sobre todo, para o financiamento de obras de mellora en fachadas, cubertas ou limpeza de leiras, así como para mellorar algúns servizos, como calefacción, electricidade ou fontanería.
Outro dos obxectivos do acordo é impulsar a actividade económica nos concellos da Mancomunidade, a través de facilitar a instalación de novos negocios. Para estes casos, Abanca ofrece créditos de ata 200.000 euros, cun prazo de amortización de 10 anos e sen gastos de estudos, amortización ou cancelación anticipada.
Á firma do acordo, ademais de representantes de Abanca, acudiron os alcaldes dos diferentes concellos pertencentes á Mancomunidade (O Pino, Arzúa, Melide, Monterroso, Palas de Rei, Paradela, Pedrafita, Portomarín, Samos, Sarria e Triacastela).
