As obras de mantemento que se están levando a cabo nos viadutos de Ruitelán e As Lamas da A-6, no termo municipal de Vega de Valcarce (León), obrigarán a partir do luns a desviar o tráfico da calzada entre os puntos quilométricos 422,4 e 428,8.
Segundo sinala o Ministerio de Transportes, Mobilidade e Axenda Urbana (Mitma) a través dunha nota de prensa, o citado corte "levará o desvío do tráfico a través da calzada sentido A Coruña", que deste xeito funcionará en modo bidireccional, contando con dous carriis cara á Coruña e un cara a Madrid.
O desvío, que estará debidamente sinalizado, iniciarase o luns e prolongarase ata o final da primavera, segundo sinala o comunicado.
Segundo aclara o ministerio, este corte total da circulación en sentido Madrid resulta necesario na actual fase de execución das obras de mantemento da autovía.
Os principais obxectivos desta actuación teñen como finalidade levar a cabo a total renovación dos sistemas de contención de vehículos, así como executar diversos traballos nos taboleiros e pilas dos viadutos, de face a mellorar o seu estado xeral de conservación.
Estas obras tamén redundarán nunha mellor calidade de rodaxe dos vehículos nestes tramos, o que se traducirá en máis comodidade e seguridade para os usuarios.