Un mozo duns 20 anos de idade foi trasladado este sábado en estado grave ao Hospital Universitario Lucus Augusti (Hula) de Lugo por culpa dunha ferida con arma branca producida durante unha liorta en Taboada. O suceso tivo lugar pola mañá no alto de San Roque e nel víronse implicadas varias persoas.
Segundo fontes consultadas por este diario, na pelexa participaron dúas bandas dedicadas ao tráfico de drogas. Unha delas encargaríase de traer as sustancias ata a comarca e a outra, de distribuílas.
Ao parecer, o conflito entre ambas xurdiu cando un membro dun dos dous grupos se sentiu atraído por unha moza pertencente ao outro bando. O romance provocou a liorta e fixo que o alto de San Roque vivise a súa particular versión da soada película musical estadounidense "West Side Story", na que dous mozos integrantes de sendas bandas rivais de Nova York se namoran profundamente.
A vítima necesitou ser intervida cirurxicamente no Hula. O suposto agresor atopábase este sábado detido no cuartel da Garda Civil de Chantada, con marcas de sangue nas súas vestimentas. A pesar diso, e segundo puido saber este xornal, negou en todo momento os feitos.
A Policía Xudicial de Lugo xa se fixo cargo da situación e investiga o sucedido. A pelexa deixou ademais varios feridos de carácter leve, con golpes e mazaduras.
OS VECIÑOS. O alto de San Roque é un pequeno núcleo de poboación situado entre Chantada e Taboada (forma parte do segundo municipio) composto por dúas filas de casas separadas pola estrada N-540. A pesar de que os feitos ocorreron a plena luz do día, os seus habitantes non foron apenas conscientes da gravidade da situación.
Dúas veciñas recoñeceron escoitar ruído procedente unha discusión a media mañá, arredor das 11.00 horas, na zona. Con todo, ningunha delas viu a agresión con arma branca.
"Cando baixei tomar café ao bar que hai aquí comentáronme que houbera unha liorta, pero desde a miña casa non vin nada", dixo unha veciña. "Escoitouse barullo fóra, pero non sabemos de quen se trataba", sinalou outra.
Un dos residentes consultados precisou que se atopaba recollendo mazás no momento no que ocorreu a pelexa e tampouco viu nada. As identidades e procedencia dos implicados son, ao peche desta edición, descoñecidos.
