A nave de servizos que o Concello de Outeiro de Rei posúe no polígono empresarial e que utiliza como almacén de material e ferramentas de obras foi obxecto dun cuantioso roubo durante a madrugada do mércores. Entre outros obxectos, os ladróns levaron un vehículo 4x4 tipo pick-up que incluso podería ser usado para cargar con parte do material subtraído.
O alcalde de Outeiro de Rei, José Pardo Lombao, afirmou sentirse "abatido" polo suceso e, aínda que na tarde do mércores os traballadores municipais aínda non puideran realizar o reconto definitivo do material subtraído, avanzou que as perdas eran "cuantiosas".
Ademais do vehículo, os ladróns levaron numerosas ferramentas e material que se gardaba na nave, cuxa alarma non foi suficiente como para facer desistir os ladróns das súas intencións.
O roubo cometeuse ao longo da madrugada. Para acceder ao interior das instalacións, os ladróns forzaron varias portas e, unha vez dentro, tamén provocaron danos para poder acceder a distintas dependencias.
A Garda Civil traballa agora en identificar os asaltantes. Para iso, revisaron as cámaras de seguridade da nave dunha empresa próxima ao lugar dos feitos.
PREOCUPACIÓN. Os empresarios do polígono de Outeiro de Rei ven con preocupación o aumento de roubos deste tipo na zona, xa que son moitas as naves afectadas nos últimos meses.Empresarios do polígono quéixanse de inseguridade ante o aumento deste tipo de delitos
O propietario dun destes negocios revelou que xa sufriu uns oito roubos, pero que ultimamente xa é remiso a denunciar porque, segundo el, "non serve para nada, xa que seguen roubando".
Este empresario, que afirma investir máis de 30.000 euros en elementos de seguridade para a súa nave sen que ata o momento se mostrasen totalmente eficaces, explica que é necesario refozar os medios cos que conta a Garda Civil na zona, "xa que as patrullas teñen que vixiar un territorio moi extenso e non poden estar en tantos sitios á vez" e que se os roubos se seguen cometendo é porque "hai xente que compra ese material roubado".
