Unha empresa de distribución alimentaria situada no Corgo foi obxecto dun aparatoso roubo perpetrado durante a madrugada deste luns. Os ladróns subtraeron da súa nave de almacenaxe un camión que cargaron con mercancía alimentaria por valor de 22.000 euros, segundo calcula a vítima do delito, que prefire manter o seu anonimato, dado que non é a primeira vez que os cacos asaltan as súas instalacións.
A voz de alarma deuna a súa nai ao redor das 3.45 horas, ao escoitar ruídos na nave -á beira da que viven- e ao distinguir desde a súa fiestra o perfil dun home con actitude vixiante nas inmediacións. Con todo, cando o seu fillo chegou ao recinto, os cacos xa fuxiran.
"Tiveron que ser entre oito e dez persoas; do contrario sería imposible que fixesen o que fixeron", indica o dono da empresa. Se o camión xa estaba cargado con 2.700 quilogramos de queixo, os cacos subiron nel un total de 2.400 quilogramos máis, ademais doutros produtos como bacallau en salgadura ou xamón, segundo conta. "Foron moi rápidos e moi hábiles, coma se coñecesen completamente o lugar", lamenta o empresario corgués, que tamén calcula uns 500 euros en danos.
A estas perdas sumaba a do vehículo pesado, que valorou en preto de 50.000 euros. O empresario non só denunciou o roubo ante a Garda Civil, senón que el mesmo lanzouse a buscar o camión, xunto a varios dos seus familiares e amigos, que durante toda a noite percorreron as vías do Corgo e dos municipios limítrofes.
O vehículo pesado que levaron os cacos apareceu a última hora da tarde con numerosos danos e totalmente baleiro
A procura, con todo, non deu os seus froitos ata última hora da tarde deste luns, cando un veciño -que vira en redes sociais un anuncio da vítima informando da matrícula e características do camión- informou á Garda Civil que o viu abandonado na canteira de Bascuas, moi preto da estrada LU-530 que une Lugo coa Fonsagrada. O vehículo pesado aparició sen rastro da carga e con numerosos danos. Xunto a el, os ladróns tamén abandonaron un dos dous turismos que roubaron noutro municipio para asaltar a nave.
Este empresario sufriu outro roubo semellante -aínda que non tan cuantioso- hai unha década. Naquel momento, tamén levaron un camión que apareceu o mesmo día. Ademais, este home xa alertara á Benemérita, hai uns meses, da presenza de persoas "sospeitosas que semellaban vixiar a nave". "Creo que deixaron pasar un tempo e agora roubaron", di.
RÁBADE. Descoñecidos entraron tamén nunha nave de Rábade da que levaron oito motosierras e 800 euros en metálico. As perdas totais neste caso ascenden a uns 4.000 euros.
