O propietario dun camión que se atopaba estacionado na vía que leva á área de servizo de Outeiro de Rei denunciou o domingo o roubo duns 450 litros de gasóleo que lle subtraeron do depósito de combustible do seu vehículo.
O feito, que se produciu na noite do sábado ao domingo, produciu un gran malestar entre os compañeiros da vítima, xa que o camión estaba estacionado a escasos 50 metros dunha gasolineira que permanece aberta as 24 horas do día, polo que non se explican como é posible que ninguén vise nada.
"A vía onde estaba o camión é a única de entrada e saída á área de servizo, polo que non sei como puideron facer para levar o gasóleo sen que ninguén vise nada", explicaba a este medio un compañeiro do camioneiro roubado.
Todo parece indicar que os ladróns tiveron que actuar con gran rapidez, xa que lles foi imposible cargar con todas as garrafas de combustible, polo que optaron por abandonar algunhas cheas no mesmo lugar dos feitos. Tamén deixaron a mangueira coa que subtraeron o gasóleo, provocando que varios litros de combustible se derramasen polo chan, co consecuente risco.
Segundo este compañeiro da vítima "lamentablemente a este tipo de sucesos estamos moi afeitos e, a verdade, sentímonos moi desprotexidos xa que non percibimos que ninguén faga nada por evitalos". O feito de que a subtracción se producise a poucos metros da estación de servizo non fai senón aumentar o malestar deste colectivo, xa que, segundo explica este transportista, "o habitual é que cando aparcamos nestas zonas o propietario da área incluso nos cobre, polo que como mínimo debería contar con vixilancia".
