A portavoz socialista do goberno da Deputación de Lugo, Pilar García Porto, lamentou que o PP "non condene tallantemente ou desfeita intencionada dunha estrada provincial en Portomarín". Cualificou de acto "delitivo, que danou un ben público e puxo en perigo ás persoas", o levantamento do firme cun tractor ou unha paleadora con sublador nun tramo duns 110 metros na vía LU-P-4902, que vai desde Alto do Valiño a Valdeporras. Á deputada do PSOE estráñalle a morneza do PP, "que di preocuparse tanto polo estado das vías provinciais".
García Porto recalcou que calquera formación política democrática "ten que condenar estes feitos, pero, como tantas veces, xa vemos que a defensa dos valores sociais e da democracia que fai o PP e tan só un paripé".
Os socialistas lucenses indican que a páxina web oficial do PP non fixo ningunha mención ao sucedido nin o mércores, nin durante a mañá do xoves, "nin se produciu ningún comunicado de condena". Porto recorda que tampouco se desautorizou a un representante político do PP da zona que declarou á TVG "que a Deputación tería que plantar algo nesa estrada, o que nos parece unha irresponsabilidade".
Os socialistas critican que responsables do PP na zona digan que a Deputación "podería plantar algo nesa estrada"
PP. O portavoz do grupo provincial do PP, Javier Castiñeira, agradeceu a celeridade do servizo de vías e obras da Deputación para reparar o tramo danado da LU-P-4902. O político popular aclara que, se os danos na calzada foron intencionados, merecen a súa total repulsa, "porque a forma de expresar a protesta debe ser, como fai o noso partido, nos plenos da Deputación e nos medios, sempre tratando de ir en positivo".
No Partido Popular esperan que, unha vez en marcha a reparación no lugar onde se produciron as desfeitas, "se continúe ata completar todo o tramo en mal estado da citada vía".
Castiñeira recorda que o seu grupo "leva meses denunciado o malestar de moitas asociacións de veciños, de alcaldes e concelleiros polo mal estado das vías provinciais". Por iso, demanda un plan de estradas, "ambicioso, a longo prazo e co obxectivo de conseguir o arranxo máis rápido posible dos viais en malas condicións, pero PSOE e BNG rexeitan as nosas propostas".
A Garda Civil segue coas pescudas para localizar aos autores da desfeita da estrada. Axentes interrogaron a veciños da zona, pero de momento non se produciu ningunha detención.
