O Servizo Galego de Saúde (Sergas) e o Concello de Guntín asinaron este venres o convenio de colaboración para a posta en marcha do plan integral de asistencia a enfermos crónicos, coñecido como Ariadna, e que xa funciona en Baleira desde hai dous anos.
O programa ten como finalidade a atención proactiva dos pacientes, é dicir, que non teñen a necesidade de chamar se se atopan mal, senón que é o persoal sanitario o que se encarga de levar un control exhaustivo dos enfermos a través de visitas a domicilio e apoio telefónico.
O fin último do plan é evitar hospitalizacións innecesarias e fomentar actividades preventivas, educativas e terapéuticas encamiñadas a mellorar a calidade de vida dos pacientes.
Dentro do convenio asinado este venres polo alcalde en funcións, Jesús Carreira, e os responsables da Estrutura Organizativa de Xestión Integral (Eoxi) de Lugo, Cervo e Monforte, o Concello comprométese a pór a disposición do Sergas un vehículo de titularidade municipal para facilitar os desprazamentos dos sanitarios, mentres que o Sergas asume a prestación do servizo achegando os recursos humanos e materiais necesarios.
O programa funciona no concello de Baleira desde hai dous anos cuns resultados moi satisfactorios
A necesidade deste servizo xorde polos importantes cambios poboacionais que se produciron nas zonas rurais e nos que se pasou de atender fundamentalmente a pacientes con patoloxías agudas a prestar atención a unha poboación máis envellecida e con enfermidades crónicas.
A atención a estas persoas prestarase a través dun equipo multidisciplinar de profesionais, desde persoal médico, a traballadores sociais e persoal de enfermería, segundo as necesidades individuais de cada paciente.
Para conseguir este obxectivo realizouse durante os últimos meses un estudo detallado das necesidades sociosanitarias dos posibles usuarios. En función destes resultados deseñouse un plan personalizado sobre as necesidades de cada paciente, co propósito de levar un control individualizado de cada un deles e co
PILOTO. O programa que se pon en marcha agora en Guntín ten os seus antecedentes no plan piloto que se empezou a funcionar no concello de Baleira hai case dous anos, con resultados moi satisfatorios segundo os usuarios.
Neste caso, o perfil dos pacientes é duns 80 anos de idade, que no 78,2% dos casos presentan máis de dúas patoloxías. Segundo datos recollidos durante o tempo que leva funcionando, o 98,6% dos usuarios manifestaron sentirse moi satisfeitos co servizo. Por iso, o obxectivo do Sergas é ir estendendo o programa de forma progresiva a outros municipios do rural.
