O Concello de Friol conta cun novo centro social. Nesta ocasión, son os veciños da parroquia de Lea quen poderán gozar das novas instalacións, nas que o Concello investiu 40.000 euros, que serviron para converter a antiga escola nun lugar de encontro para os veciños.
O alcalde da localidade, José Ángel Santos, xa entregou as chaves do local aos veciños "para que poidan comezar a facer uso deste centro canto antes, porque os centros sociais teñen como finalidade ser un lugar de encontro dos veciños para levar a cabo nesas instalacións distintos actos que os propios veciños consideren axeitado no seu beneficio", asegurou o rexedor.
A rehabilitación do centro social de Lea comezou no ano 2017 e as obras finalizaron a finais do pasado 2018. O edificio, que consta de 100 metros cadrados distribuídos nunha soa planta, foi totalmente restaurado. A actuación consistiu na rehabilitación da contorna, cimentacións, estrutura, cuberta, fachadas, illamento e impermeabilizacións, particiones interiores e falsos teitos, revestimentos, carpinterías, fontanería, electricidade e iluminación, calefacción e ventilación, protección contra incendios, aparellos sanitarios, urbanización exterior e xestión de residuos. A empresa encargada das obras foi Cholo S.L.
Santos confía en que nas próximas datas o Concello poida entregar o centro social en Vilafiz, onde tamén se está finalizando a rehabilitación da antiga escola. O rexedor explicou que desde o goberno municipal traballan para adecuar locais en todas as parroquias que así o demanden.
"Nestes momentos, desde o Concello estase redactando o proxecto de rehabilitación do centro social da parroquia de Vilalvite, que será na antiga casa escola que na actualidade está en desuso polo gran deterioración que sofre", comentou José Ángel Santos, que indicou que os veciños demandaron a rehabilitación do edificio para empregar como local social "e empezamos coas xestións para que sexa unha realidade".
